बीड : जिल्ह्यातील वडवणी तालुक्यातील लिमगाव येथे आकाशातून अचानक दगड पडल्याची धक्कादायक घटना घडली आहे. या घटनेमुळे गावक-यांमध्ये भीतीचे वातावरण आहे. तहसील प्रशासन आणि भूवैज्ञानिकांनी घटनास्थळी पाहणी केली आहे. मात्र, दगड पडण्याचे नेमके कारण अद्याप स्पष्ट झालेले नाही.
दरम्यान, गुन्ह्यांच्या घटनांमुळे देशभरात चर्चेत असलेल्या बीडमध्ये आणखी एक खळबळजनक घटना घडली आहे. बीडच्या वडवणी तालुक्यातील लिमगावात आकाशातून अचानक दगड पडले. आकाशातून दगड पडल्याने मोठा आवाज झाला. त्यामुळे एकच खळबळ उडाली आहे. तहसील प्रशासनाने हे दगड ताब्यात घेतले आहेत. तसेच छत्रपती संभाजीनगर येथील भूवैज्ञानिकांनी घटनास्थळी जाऊन पाहणी केली आहे. मात्र, गावात अचानक आकाशातून दगड पडल्याने गावकरी दहशतीखाली आहेत.
४ मार्च रोज दुपारच्या दरम्यान आकाशात प्रचंड मोठा आवाज होऊन दोन ते चार दगड पडले असल्याची घटना मौजे खळवट लिमगाव येथे घडली आहे. या घटनेची माहिती मिळताच तहसील प्रशासनाने तात्काळ घटनास्थळी भेट देत पाहणी आणि पंचनामा केला आहे. आकाशातून पडलेले दगड देखील ताब्यात घेतले आहेत. तर आज सकाळी छत्रपती संभाजीनगर येथील एमजीएम विद्यापीठाचे भूवैज्ञानिक शास्त्रज्ञांच्या टीमने घटनास्थळी जाऊन पाहणी केली. तसेच घटनेचा प्रकार लक्षात घेत गूढ काय ते लवकरच कळवू अशी माहिती दिली आहे. तर या घटनेमुळे ग्रामस्थांमधून भीती व्यक्त केली जात आहे.
