मुंबई : प्रतिनिधी
न्यू इंडिया को-ऑपरेटिव्ह सहकारी बँकेच्या १२२ कोटींच्या घोटाळ््याप्रकरणी मुंबईच्या आर्थिक गुन्हे शाखेने जावेद आझमला अटक केली. जावेद आझम हा भाजप नेता हैदर आझम यांचा भाऊ आहे. जावेदला २४ मार्चपर्यंत पोलीस कोठडी देण्यात आली आहे. आर्थिक गुन्हे शाखेकडून बँक घोटाळ्यातील आझम हा अटक झालेला सतवा आरोपी आहे.
व्यावसायिक उन्नथन अरुणाचलनच्या अटकेनंतर चौकशीत नाव समोर आल्यानंतर जावेद आझमला चौकशीला बोलवण्यात आले होते. चौकशीनंतर काल रात्री उशिरा मुंबई पोलिसांच्या आर्थिक गुन्हे शाखेने जावेदला अटक केली. जावेद आझमचा इलेक्ट्रॉनिकचा व्यवसाय असून त्यासाठी उन्नथन अरुणाचलमने त्याला १८ कोटी दिल्याचा आरोप आहे.
रिझर्व्ह बँक ऑफ इंडियाच्या अधिका-यांनी न्यू इंडिया को-ऑप बँकेतील १२२ कोटींची रक्कम गहाळ झाल्याबाबत चौकशी केल्यानंतर १२ फेब्रुवारी रोजी सदर घोटाळा समोर आला होता. या प्रकरणी आतापर्यंत ७ जणांना ताब्यात घेण्यात आलेले आहे. न्यू इंडिया को ऑपरेटिव्ह बँकेचे महाव्यवस्थापक आणि अकाऊंट विभागाचे प्रमुख हितेश मेहता, माजी सीईओ अभिमन्यू भोअन, बांधकाम व्यावसायिक धर्मेश पौन, मालाड येथील व्यापारी उन्नाथन अरूणाचलम आणि त्यांचे बंधू मनोहर अरुणाचलम आणि कंत्राटदार कपिल देढिया यांचा समावेश आहे.
बँकेच्या ३० पेक्षा जास्त शाखा
३० पेक्षा जास्त शाखा असलेल्या आणि बहुराज्य सहकारी बँकेचा दर्जा मिळविलेल्या न्यू इंडिया को-ऑपरेटिव्ह बँकेवर रिझर्व्ह बँकेने निर्बंध लादण्यासह तिचे संचालक मंडळ बरखास्त करण्याची कारवाई केली. तसेच या बँकेवर ‘प्रशासक’ नियुक्त करण्यात आला आहे.
