नवी दिल्ली : वृत्तसंस्था
चालू आर्थिक वर्ष २०२३-२४ मध्ये प्रत्यक्ष कर संकलनात २२ टक्के वाढ झाली आहे. १ एप्रिल ते ९ नोव्हेंबर २०२३ या कालावधीत प्रत्यक्ष कर संकलन १०.६० लाख कोटी रुपये आहे. चालू आर्थिक वर्षासाठी अर्थसंकल्पात निश्चित केलेल्या प्रत्यक्ष कराच्या लक्ष्यापैकी ५८ टक्के रक्कम आधीच सरकारच्या तिजोरीत जमा झाली आहे.
सीबीडीटीने प्रत्यक्ष कर संकलनाची तात्पुरती आकडेवारी जाहीर केली. त्यानुसार चालू आर्थिक वर्ष २०२३-२४ मध्ये ९ नोव्हेंबर २०२३ पर्यंत प्रत्यक्ष कर संकलनात स्थिर वाढ दिसून आली आहे. प्रत्यक्ष कर संकलन १२.३७ लाख कोटी रुपये झाले आहे, जे गतवर्षीच्या तुलनेत १७.५९ टक्के अधिक आहे. करदात्यांना जारी केलेला परतावा वगळता निव्वळ प्रत्यक्ष कर संकलन १०.६० लाख कोटी रुपये आहे. जे मागील आर्थिक वर्ष २०२२-२३ मधील याच कालावधीपेक्षा २२ टक्के अधिक आहे. सीबीडीटीचे एकूण प्रत्यक्ष कर संकलन २०२३-२४ च्या अर्थसंकल्पीय अंदाजाच्या ५८.१५ टक्के आहे.
प्रत्यक्ष कर संकलनात कॉर्पोरेट आयकरात ७.१३ टक्क्यांनी वाढ झाली तर वैयक्तिक आयकरात २८.२९ टक्के वाढ झाली. यामध्ये सुरक्षा व्यवहार कर जोडला तर एकूण वैयक्तिक आयकर संकलनात २७.९८ टक्के वाढ झाली आहे. करदात्यांना जारी केलेल्या परताव्यांच्या समायोजनानंतर कॉर्पोरेट आयकर संकलनात १२.४८ टक्के आणि वैयक्तिक आयकर संकलनात ३१.७७ टक्के वाढ झाली आहे आणि एसटीटी यामध्ये समाविष्ट केल्यास वाढीचा दर ३१.२६ टक्के आहे. या कालावधीत आयकर विभागाने १ एप्रिल ते ९ नोव्हेंबर २०२३ दरम्यान १.७७ लाख कोटी रुपयांचा परतावा जारी केला आहे.
