मंचर : पुणे-नाशिक राष्ट्रीय महामार्गावर मंचरच्या दक्षिण बाजूला तीन किलोमीटर अंतरावर भोररवाडी तांबडे मळा (तालुका आंबेगाव) येथे शनिवारी सकाळी स्विफ्ट कार, टेम्पो व कंटेनरच्या विचित्र अपघातात स्विफ्ट कार जागीच जळून खाक झाली आहे. स्विफ्टमधील तीन जणांचा होरपळून मृत्यू झाल्याची धक्कादायक माहिती पुढे येत असून सुदैवाने स्विफ्ट कारचा चालक व टेम्पोचा चालक बचावला आहे.
मृत ३ तरुण खेड तालुक्यातील राक्षेवाडी येथील असल्याची माहिती प्राप्त होत आहे. या परिसरात वाहतूक कोंडी मोठ्या प्रमाणात झाली आहे.
मंचरपासून जवळच असणा-या भोरवाडी परिसरात पुणे-नाशिक महामार्गावर पुण्याच्या दिशेने जाणारा एक कंटेनर बंद अवस्थेत उभा होता. त्याच ठिकाणी आज सकाळी टेम्पो व स्विफ्ट कार यांच्यात जोरदार धडक झाली. धडक झाल्यानंतर टेम्पो पुढे जाऊन उभ्या असलेल्या कंटेनरला धडकला तर स्विफ्ट गाडीने पेट घेतला. त्यात स्विफ्ट गाडी पूर्णत: जळून खाक झाली आहे.
