नवी दिल्ली: ब्रँड प्रमोशन आणि जाहिरातींच्या दुनियेत सध्या एका आगळ्यावेगळ्या विषयाची तुफान चर्चा रंगली आहे. बॉलिवूडचा बादशहा शाहरुख खान असो वा फुटबॉलचा महानायक ख्रिस्तियानो रोनाल्डो, कोणत्याही ब्रँडची जाहिरात करण्यासाठी हे दिग्गज कोट्यवधी रुपये मानधन (चार्ज) घेतात. एका बाजूला शाहरुख खान एका जाहिरातीसाठी सुमारे १५ कोटी रुपये आणि रोनाल्डो तब्बल २० कोटी किंवा त्याहून अधिक रक्कम आकारत असताना, दुसरीकडे भारताचे पंतप्रधान नरेंद्र मोदी यांनी मात्र एका प्रसिद्ध भारतीय चॉकलेट ब्रँडची ‘फ्री’मध्ये जाहिरात केल्याचे बोलले जात आहे. हा ब्रँड दुसरा तिसरा कोणी नसून गेल्या अनेक दशकांपासून भारतीयांच्या जिभेवर रेंगाळणारा ‘पार्ले मेलडी’ (Parle Melody) हा आहे.
नक्की काय आहे प्रकरण?
पंतप्रधान नरेंद्र मोदी यांच्या इटली दौऱ्यादरम्यान एक रंजक आणि सोशल मीडियाला वेड लावणारी घटना घडली. पंतप्रधान मोदींनी इटलीच्या पंतप्रधान जॉर्जिया मेलोनी यांना ‘पार्ले मेलडी’ चॉकलेटचे एक पाकीट भेट म्हणून दिले. जॉर्जिया मेलोनी यांनी स्वतः या ‘चॉकलेट मोमेंट’चा एक छान व्हिडिओ सोशल मीडियावर शेअर केला आणि कॅप्शनमध्ये लिहिले, “या गोड भेटीसाठी धन्यवाद!” इंटरनेटवर गेल्या काही काळापासून मोदी आणि मेलोनी यांच्यातील मैत्रीला चाहत्यांनी ‘मेलोडी’ (Melodi – Modi + Meloni) हे नाव दिले आहे. अशातच प्रत्यक्ष ‘मेलडी’ चॉकलेट समोर आल्याने सोशल मीडियावरील मीम्स आणि चर्चांचा पूर आला.
कोट्यवधींचे ‘फ्री पीआर’ (Free PR)
या एका छोट्याशा व्हिडिओमुळे पार्ले कंपनीला जे जागतिक स्तरावर प्रमोशन मिळाले, त्यासाठी कंपन्यांना कोट्यवधी रुपये मोजावे लागतात. सोशल मीडिया युजर्स मजेशीरपणे म्हणत आहेत की, “जिथे जाहिरातीसाठी शाहरुख १५ कोटी आणि रोनाल्डो २० कोटी घेतात, तिथे मोदींनी मेलडी चॉकलेट जागतिक मंचावर नेऊन त्याचे फुकटात प्रमोशन करून दिले!” यावर प्रतिक्रिया देताना पार्ले प्रॉडक्ट्सचे उपाध्यक्ष मयंक शाह यांनीही आनंद व्यक्त केला. ते म्हणाले, “पंतप्रधानांनी मेलोनी यांना ‘मेलडी’ चॉकलेट भेट देणे हा भारतीय उत्पादनांना जागतिक व्यासपीठावर नेण्याचा एक उत्तम मार्ग आहे. या ‘इंटरनेट-ब्रेकिंग’ क्षणामुळे देशात आणि परदेशात मेलडीच्या विक्रीत मोठी वाढ होण्याची शक्यता आहे.” कंपनीने आपल्या अधिकृत इंस्टाग्राम हँडलवरून हा व्हिडिओ शेअर करत ‘१९८३ पासून नाती गोड करत आहोत’ अशी खास ओळही लिहिली.
शेअर बाजारात उडाली गडबड!
या व्हायरल व्हिडिओचा परिणाम भारतीय शेअर बाजारावरही (Dalal Street) पाहायला मिळाला. व्हिडिओ व्हायरल होताच ‘पार्ले’ नाव असलेल्या एका कंपनीच्या शेअर्सना ५ टक्क्यांचे अप्पर सर्किट लागले. परंतु, गमतीची गोष्ट म्हणजे ज्या ‘पार्ले इंडस्ट्रीज’चे शेअर्स लोकांनी खरेदी केले, त्याचा मेलडी चॉकलेट बनवणाऱ्या ‘पार्ले प्रॉडक्ट्स’शी (जी एक खाजगी कंपनी आहे) काहीही संबंध नाही. केवळ नावाच्या साधर्म्यामुळे गुंतवणूकदारांनी घाईघाईत खरेदी केल्याने हा गोंधळ उडाला. सध्या सोशल मीडियावर एकच प्रश्न ट्रेंड होत आहे— ‘मेलडी इतकी चॉकलेटी का आहे?’ आणि युजर्स त्याचे उत्तर देत आहेत— ‘कारण आता याला पंतप्रधानांचाही टच मिळाला आहे!’
