मुंबई : दुर्गा विसर्जनाच्या पार्श्वभूमीवर मुंबई पोलिसांनी एक अत्यंत महत्त्वाचा आदेश जारी केला आहे. २० ते २२ ऑक्टोबर दरम्यान दुर्गा विसर्जनाच्या वेळी पाण्यात तरंगणा-या किंवा अर्धवट विसर्जित झालेल्या (बुडालेल्या) दुर्गामूर्तींचे फोटो किंवा व्हीडीओ काढण्यास आणि व्हायरल करणा-यांवर बंदी घालण्यात आली आहे.
मुंबईचे पोलिस उपायुक्त अकबर पठाण यांनी नव्याने लागू झालेल्या भारतीय नागरिक सुरक्षा संहिता, २०२३ च्या कलम १६३ अंतर्गत हा आदेश जारी केला आहे. नागरिकांच्या धार्मिक भावना दुखावल्या जाऊ नयेत आणि शहरात सार्वजनिक शांतता व सुव्यवस्था अबाधित राहावी, या उद्देशाने हा निर्णय घेण्यात आला आहे. पोलिसांनी जारी केलेल्या आदेशानुसार, २० ते २२ ऑक्टोबर या कालावधीत मुंबई शहरातील विविध तलाव, समुद्रकिनारे आणि जलाशयांमध्ये देवी दुर्गेच्या मूर्तींचे विसर्जन केले जाईल.
या प्रक्रियेदरम्यान, समुद्रातील भरती-ओहोटीमुळे किंवा तलावाच्या पाण्यावर तरंगत काही अर्धवट विरघळलेल्या मूर्ती पुन्हा किना-यावर येण्याची शक्यता असते. अशा वेळी बीएमसीचे कर्मचारी या मूर्ती पाण्याबाहेर काढण्याचे काम करतात.
पोलिसांनी स्पष्ट केले आहे की, अशा अर्धवट विसर्जित मूर्तींचे फोटो किंवा व्हीडीओ काढणे, ते सोशल मीडियावर व्हायरल करणे किंवा बीएमसी कर्मचा-यांनी त्या मूर्ती बाहेर काढतानाचे दृश्य शेअर केल्यास भाविकांच्या धार्मिक भावना दुखावल्या जाऊ शकतात. यातून सार्वजनिक शांतता आणि कायदा व सुव्यवस्थेचा प्रश्न निर्माण होऊ शकतो. त्यामुळे अशा प्रकारची कोणतीही कृती टाळण्यासाठी तत्काळ खबरदारीची पावले उचलणे आवश्यक आहे. या आदेशाचे उल्लंघन करणा-यांवर कायदेशीर कारवाईचा इशाराही देण्यात आला आहे.
