सोलापूर : विद्युत डीपीवर चढून दुरुस्तीचे काम करत असताना जोरात विजेचा धक्का लागल्याने खाली कोसळून गंभीर जखमी झालेल्या एमएसईबीच्या कंत्राटी वायरमेनचा दुर्दैवी मृत्यू झाला. ही घटना गुरुवारी दुपारच्या सुमारास शेळगी परिसरातील जवाहर नगर या ठिकाणी घडली.
अविनाश मूळजे वय वर्ष अंदाजे 45, असे मरण पावलेल्या वायरमनचे नाव आहे. मयत हे शेळगी परीसरातील जवाहर नगर येथील डीपीवर चढून विद्युत दूरूस्तीचे काम करत असताना जोराचा विद्युत झटका लागल्याने डीपीवरून खाली कोसळून गंभीर जखमी झाले. त्या अवस्थेत त्यांना तात्काळ जवळच असलेल्या हैदराबाद रोडवरील यशोधरा हॉस्पिटल येथे दाखल केले परंतु डॉक्टरांनी त्यास उपचारापूर्वीच मृत घोषित केले.
ही घटना दुपारी साडे तीन वाजता घडली. सध्या हॉस्पिटलमध्ये नातेवाईक व मित्रांनी मोठी गर्दी केली आहे. सेफ्टी किट नसल्याने कंत्राटी कामगार अविनाशचा मृत्यू झाला असल्याची चर्चा ऐकण्यास मिळत आहे.
