हिंगोली : राज्यातील दुष्काळी परिस्थितीमुळे शेतकरी आर्थिक संकटात सापडले असताना सरकारने जाहीर केलेल्या ५ हजार रुपयांच्या अग्रीम मदतीवरून आता संताप व्यक्त होत आहे. हिंगोली जिल्ह्यातील गोरेगाव येथील अप्पर तहसील कार्यालयासमोर शेतक-यांनी या मदतीच्या रकमेची उधळण करत सरकारविरोधात घोषणा दिल्या.
राज्यातील दुष्काळी परिस्थिती लक्षात घेऊन सरकारने दिवाळीपूर्वी शेतक-यांच्या बँक खात्यांत ५ हजार रुपयांची अग्रीम मदत जमा करण्याची घोषणा केली आहे. मात्र, या मदतीवरून शेतकरी संघटनांसह विरोधी पक्षातील नेत्यांनीही सरकारला लक्ष्य केले आहे. दुष्काळामुळे शेतक-यांचे मोठे आर्थिक नुकसान झाले असताना जाहीर केलेली मदत शेतीचा खर्च भागवण्यासाठीही अपुरी असल्याचे त्यांचे म्हणणे आहे. हिंगोलीतील गोरेगाव येथे शेतक-यांनी प्रत्यक्ष कृतीतून नाराजी व्यक्त केल्याने या मुद्याला अधिक महत्त्व प्राप्त झाले आहे.
दुष्काळी परिस्थितीमुळे पिकांचे नुकसान, पाण्याची टंचाई आणि वाढता उत्पादन खर्च अशा अनेक समस्यांचा सामना शेतक-यांना करावा लागत आहे. बियाणे, खते, औषधे, मशागत आणि मजुरी यांसाठी मोठा खर्च करावा लागतो. त्यात पावसाअभावी किंवा प्रतिकूल हवामानामुळे उत्पादन घटल्यास शेतक-यांचे आर्थिक गणित पूर्णपणे बिघडते. अशा परिस्थितीत सरकारकडून मिळणारी मदत नुकसानाच्या तुलनेत अत्यंत कमी असल्याची भावना शेतक-यांमध्ये आहे. याच नाराजीतून गोरेगाव येथील अप्पर तहसील कार्यालयासमोर शेतक-यांनी ५ हजार रुपयांच्या नोटा उधळून निषेध नोंदवला. सरकारने दिलेली मदत स्वीकारण्यापेक्षा शेतक-यांना त्यांच्या नुकसानीच्या प्रमाणात आर्थिक सहाय्य मिळणे आवश्यक असल्याचा संदेश या आंदोलनातून देण्यात आला. दुष्काळाचा सामना करण्यासाठी केवळ तात्पुरती मदत न देता शेतक-यांना आर्थिक संकटातून बाहेर काढण्यासाठी ठोस उपाययोजना कराव्यात, अशी मागणीही या पार्श्वभूमीवर होत आहे.
—————–
