मुंबई : प्रतिनिधी
मंत्रालय सुरक्षा प्रकल्प राबविण्यात येत आहे. या प्रकल्पातंर्गत पहिल्या टप्प्यात चेहरा ओळख आधारित प्रवेश प्रक्रिया कार्यान्वीत करण्यात आली. त्यानंतर टप्पा २ अंतर्गत प्रवेशासाठी व्हीजीटर मॅनेजमेंट सिस्टीम प्रणाली विकसित करण्यात आली. मंत्रालयात क्षेत्रीय कार्यालयातील अधिकारी व कर्मचारी, अभ्यांगत यांना यापुढे कोणत्याही कामाकरिता प्रवेश हवा असल्यास ‘डिजीप्रवेश’ या ऑनलाईन अ‍ॅप आधारित प्रणालीद्वारे मंत्रालयात प्रवेश मिळणार आहे.
अभ्यांगतांना मंत्रालयाच्या ज्या विभागात कामानिमित्त प्रवेश आवश्यक आहे. त्यासाठी त्यांना दिलेल्या वेळेत आणि अनुज्ञेय असलेल्या मजल्यावरच प्रवेश मिळणार आहे. अनधिकृत मजल्यावर प्रवेश केल्यास अभ्यांगत कारवाईस पात्र राहतील. अभ्यांगतांनी संबंधित विभागातील आपले काम पूर्ण झाल्यावर विहीत वेळेत मंत्रालयातून बाहेर पडावे. ज्येष्ठ नागरिक व दिव्यांग अभ्यांगतांना रांगेत उभे राहण्यामुळे होणारा त्रास विचारात घेता त्यांना दुपारी १२ वाजता प्रवेश देण्यात येईल तर दुपारी १२ नंतर ज्येष्ठ नागरिक व दिव्यांग अभ्यांगत यांच्यासाठी स्वतंत्र रांगेची व्यवस्था राहील. तसेच ज्येष्ठ नागरिक व दिव्यांग अभ्यांगत यांनी तत्संबंधीचे वैध प्रमाणपत्र सोबत ठेवणे आवश्यक आहे.
मंत्रालयात येणा-या सर्व अभ्यांगतांना दुपारी २ नंतर प्रवेश देण्यात येईल, असे सांगण्यात आले. डिजीप्रवेश या ऑनलाईन अ‍ॅप आधारीत प्रणालीद्वारे मंत्रालय प्रवेशपास घेऊन मंत्रालयात प्रवेश मिळविता येणार आहे. अभ्यागतांनी मंत्रालयात प्रवेश मिळविण्यासाठी आधार कार्ड, वाहन परवाना, पॅन कार्ड आदी शासन मान्य ओळखपत्र सादर करणे आवश्यक आहे. अशिक्षित तसेच स्मार्टफोन नसलेल्या अभ्यांगतांकरिता गार्डन गेट येथे ऑनलाईन अ‍ॅप आधारीत प्रणालीद्वारे मंत्रालय प्रवेश नोंदणी किंवा मदतीकरिता एक खिडकी उपलब्ध असणार आहे.
