मुंबई : प्रतिनिधी
गृह राज्यमंत्री योगेश कदम यांच्या मातोश्रींच्या नावे असणा-या सावली डान्सबारमध्ये चालणा-या अवैध गोष्टी, पोलिसांनी घेतलेल्या धाडीत सापडलेले पुरावे तसेच कायदेशीर वाळू उपशाबाबतचे पुरावे शिवसेना ठाकरे गटाचे नेते अनिल परब यांनी आज मुख्यमंत्री देवेंद्र फडणवीस यांची भेट घेऊन त्यांना दिले. मुख्यमंत्री फडणवीस यांनी हे पुरावे तपासून कदम यांचा राजीनामा घ्यावा. मुख्यमंत्र्यांनी एकतर कारवाई करावी अन्यथा हे पुरावे खोटे आहेत असे स्पष्ट करावे. कारवाई केली नाही तर मुख्यमंत्र्यांचेही डान्सबारला अभय आहे असे आम्ही समजू असेही परब म्हणाले.
अनिल परब यांनी विधिमंडळाच्या पावसाळी अधिवेशनाच्या शेवटच्या दिवशी विधान परिषदेत गृह राज्यमंत्री योगेश कदम यांच्या विरोधात आरोप करून जोरदार खळबळ उडवून दिली होती. सावली या डान्सबारवर पोलिसांनी रेड केली होती. हा डान्सबार योगेश कदम यांच्या मातोश्रींच्या नावे असल्याचे अनिल परब म्हणाले होते. या प्रकरणाचा पाठपुरावा महाविकास आघाडीने लावून धरला आहे. सोमवारी विविध विषयांवर ठाकरे गटाच्या नेत्यांनी राज्यपालांची भेट घेतली होती. मंगळवारच्या दिवशी अनिल परब यांनी मुख्यमंत्री देवेंद्र फडणवीस यांची मंत्रालयात भेट घेतली. या वेळी परब यांनी आपल्या आरोपांच्या पुष्ट्यर्थ कागदपत्रेही मुख्यमंत्री फडणवीस यांना सादर केली. या आधीही दोन वेळा या बारवर रेड झाली होती. त्यांना जबाबदारी झटकता येणार नाही.
योगेश कदम यांचा राजीनामा घ्यावा, अशी मागणी केली आहे. हे पुरावे तपासून घेतो व त्यानंतर निर्णय घेतो असे मुख्यमंत्री म्हणाल्याचे परब यांनी सांगितले. एकनाथ शिंदे धर्मवीर आनंद दिघे यांच्या एका इशा-यावर ठाण्यातील डान्सबार फोडतात, असे चित्रपटात दाखविले आहे. तेच शिंदे आज डान्सबारला समर्थन देत आहेत. शिंदे आपल्या तत्त्वाशी प्रामाणिक नाहीत. खुर्ची वाचविण्यासाठी आमदारांच्या गैरकृत्यांवर पांघरूण घालत आहेत असेही परब म्हणाले.
मी माझी बाजू मांडेन : योगेश कदम
विधिमंडळाचे नियम पायदळी तुडवून परबांनी आपल्यावर आरोप केले. ते राज्यपालांकडे गेले होते कदाचित ते राष्ट्रपतींकडेही जातील; पण या खोट्या आरोपांनी माझे लक्ष विचलित होणार नाही. राज्यमंत्री म्हणून माझ्याकडे जी खाती माझ्याकडे आहेत. त्याच्या कामावर माझे लक्ष आहे. मी माझी बाजू मुख्यमंत्री देवेंद्र फडणवीस यांच्याकडे मांडेन, असे गृह राज्यमंत्री योगेश कदम यांनी सांगितले.
