बीड : बीड जिल्ह्याच्या पाटोदा पंचायत समितीमधील अधिका-यांच्या भ्रष्टाचार चव्हाट्यावर आणण्यासाठी येथील शेतक-यांनी चक्क खोट्या नोटांचे बंडलच कार्यालयात उधळल्याचे दिसून आले.
पंचायत समिती कार्यालयास ५० लाखांचे दे दान, सुटेल ग्रहण अशी घोषणाबाजी करत आणि बोंबाबोंब करत शेतक-यांनी येथील अधिका-यांकडून होत असलेल्या त्रासावर संताप व्यक्त केला. शेतक-यांना विहिरी देण्यासाठी, नागरिकांना घरकुल देण्यासाठी अधिकारी पैशांची मागणी करतात. चाराण्याची कोंबडी आणि बारण्याचा मसाला अशी येथील परिस्थिती आहे, असेही शेतक-यांनी यावेळी म्हटले.
पाटोदा पंचायत समितीमध्ये पैसे दिल्याशिवाय कामच होत नसल्याचा आरोप करत येथील काही शेतक-यांनी चक्क कार्यालयातच नोटा उधळल्याचा धक्कादायक प्रकार समोर आला आहे. येथील प्रशासकीय अधिकारी आणि कर्मचा-यांना शेतक-यांची कामं करण्यासाठी पैसेच हवे असल्याचा आरोप या शेतक-यांनी केला आहे. शेतक-यांनी खोट्या नोटांचे बंडल आणून या खोट्या नोटा सुट्या करत पंचायत समिती कार्यालयात ठेवल्या, तसेच प्रशासनाचा निषेध नोंदवला आहे.दरम्यान, शेतक-यांनी केलेल्या या आंदोलनामुळे पाटोदा पंचायत समितीमधील भ्रष्टाचाराचा कारभार चव्हाट्यावर आला आहे. या आंदोलनानंतर अधिकारी मूग गिळून गप्प असल्याचे दिसले.
