दिल्ली/नागपूर/पुणे : दिवाळीच्या उत्साहादरम्यान देशातील काही राज्यांमधून आग लागण्याच्या घटना समोर आल्या आहेत. फटाक्यांमुळे आणि शॉर्ट सर्किटमुळे भडकलेल्या आगीत देशभरात २५ जणांचा होरपळून मृत्यू झाला, तर अनेक जण गंभीर जखमी झाले आहेत. मध्य प्रदेशात सर्वाधिक १३, तर महाराष्ट्रात ६ जणांचा आगीत होरपळून मृत्यू झाला आहे.
राजस्थानच्या पाली येथे फटाक्यांच्या दुकानाला आग लागून दोन जणांचा मृत्यू झाला, तर तीन जण बेपत्ता आहेत. आगीच्या भक्ष्यस्थानी तीन दुकाने आणि अनेक दुचाकी वाहनेही जळून खाक झाली. दरम्यान, दिल्लीतील नरेला येथे रॉकेट फटाका पोटाला लागल्याने १० वर्षांच्या मुलाचा मृत्यू झाला. जम्मूच्या नेहरू मार्केटमध्ये लागलेल्या आगीत १२ हून अधिक दुकाने जळून खाक झाली, तर उत्तर प्रदेशातील बांदा येथे भंगाराच्या दुकानाला आग लागल्याने सुमारे २०-२५ लाख रुपयांचे नुकसान झाले. दुकानमालकाने फटाके फेकून आग लावल्याचा आरोप केला आहे. नागपूरमध्ये टीव्हीएसच्या शोरूमला आग लागल्याने अनेक दुचाकी वाहने जळून खाक झाली. सिक्कीमच्या गंगटोकमध्ये सरकारी निवासस्थानाला, तर महाराष्ट्रातील ठाणे येथे १७ मजली इमारतीला आग लागली. ठाणे येथे कोणालाही दुखापत झाल्याची माहिती नाही.
महाराष्ट्रातील पुण्यात दिवाळीच्या दिवशी आगीच्या ६३ घटना नोंदवण्यात आल्या. यामध्ये कोणतीही जीवितहानी झाल्याचे वृत्त नाही. मुंबईतील डोंगरी परिसरात आगीमुळे अनेक दुकाने आणि झोपड्या जळून खाक झाल्या, तर दादर येथील कामगार स्टेडियममध्ये लागलेल्या आगीवर अग्निशमन दलाच्या जवानांनी १७ मिनिटांत नियंत्रण मिळवले. मुंबईतील लोखंडवाला येथे लागलेल्या आणखी एका आगीत एका व्यक्तीचा मृत्यू झाला. याशिवाय आसाममधील जोनाई, पुण्यातील वडगाव शेरी, मुंबईतील विद्याविहार आणि गाझियाबादमधील क्रॉसिंग रिपब्लिक परिसरातही आगीच्या घटना समोर आल्या. या घटनांनंतर अग्निशमन दल आणि पोलिसांची पथके मदत व बचावकार्यात गुंतली होती.
मध्य प्रदेशात सर्वाधिक १३ जणांचा मृत्यू
मध्य प्रदेशातील कटनी जिल्ह्यात एका निवासी घराला लागलेल्या भीषण आगीत गुदमरून आणि होरपळून एकाच कुटुंबातील ६ जणांचा मृत्यू झाला. मृतांमध्ये दोन महिन्यांच्या बाळासह तीन लहान मुलांचा समावेश आहे. तसेच, सिवनी जिल्ह्यात सराफा व्यावसायिकाच्या घराला लागलेल्या आगीत ६ जणांचा मृत्यू झाला. उज्जैनमध्ये १०७ वर्षांच्या वृद्धाचा आगीत मृत्यू झाला.
राजस्थान, दिल्ली आणि इतर राज्यांमधील दुर्घटना
राजस्थानच्या पाली जिल्ह्यात फटाक्यांच्या दुकानाला आग लागली. या घटनेत २ जणांचा मृत्यू झाला. तर ३ जण बेपत्ता झाले आहेत. दिल्लीतील नरेला भागात १० वर्षांच्या बालकाच्या पोटावर फटाक्याचा रॉकेट लागल्याने त्याचा जागीच मृत्यू झाला. याशिवाय उत्तर प्रदेशातील बांदा येथे कबाड गोदामाला लागलेल्या आगीत २५ लाखांचे नुकसान झाले, तर जम्मूच्या नेहरू मार्केटमध्ये १२ पेक्षा जास्त दुकाने जळून खाक झाली.
