पाथरी : येथील नगरपरिषद अंतर्गत साईबाबा विकास आराखडा समितीमध्ये काम करणा-या कर्मचा-यांस माजी आ. बाबाजानी दुर्राणी यांच्यासह त्यांच्या कार्यकर्त्यांनी कार्यालयातच बेदम मारहाण केल्याची घटना सोमवार, दि. १७ मार्च रोजी सकाळी ११ वाजताच्या सुमारास घडली.
दरम्यान, याप्रकरणी पाथरी पोलिस ठाण्यात माजी आ. दुर्राणी यांच्यासह ८ जणांविरुद्ध शासकीय कामात अडथळा प्रकरणी गुन्हा नोंद करण्यात आला आहे. दरम्यान माजी आ. दुर्राणी यांच्यावर नुकताच मारहाणीचा गुन्हा दाखल झाला असून आठवड्यात हा दुसरा गुन्हा नोंद झाला आहे. पाथरी येथील साईबाबा विकास आराखड्याच्या अंमलबजावणी संदर्भातील कामकाज मधुकर दिवाण पाहतात. मागील ८ महिन्यापासून सदाशिव अण्णासाहेब गायकवाड हे त्यांच्याकडे सहायक म्हणून काम पाहतात. दि. १७ मार्च रोजी सकाळी ११ वाजता गायकवाड हे नगरपरिषदमधील कार्यालयात काम करत असताना माजी आ. दुर्राणी आणि ८ जण दाखल झाले.
यावेळी दुरार्णी यांनी ‘सदाशिव गायकवाड तू कायको काम कर रहा है? दिवाण कहा है? इसको बहुत ज्यादा हो गया इसको मारो’ असे म्हणत गायकवाड यास लाकडी फळीने मारहाण केली. यावेळी इतर कार्यकर्त्यांनी अश्लील शिवीगाळ करत जीवे मारण्याची धमकी दिली. यावेळी दुर्राणी हे मुख्याधिकारी यांच्या खुर्चीवर जाऊन बसले. तसेच गायकवाड यांच्या कडील वसुलीची रक्कम ५ हजार २०० रूपये आणि १५ हजार रुपये किंमतीचा मोबाईल इतरांनी हिसकावून घेतला असल्याची फिर्याद गायकवाड यांनी दिली आहे.
या फिर्यादीवरून माजी आ. बाबाजानी दुर्राणी, शहजाद बक्तीयार खान, शेख इरफान शेख, रेहान मगबुल खान दुर्राणी, हमीद खान शेर खान, शेख नशीर शेख रौफ, अब्दुल इब्राहीम अब्दुल रशीद अन्सारी व शेख अलताफ शेख मुल्लाक अशा ८ जणांवर पाथरी पोलिस ठाण्यात गुन्हा नोंद करण्यात आला आहे.
