मुंबई : प्रतिनिधी
राज्यात आरोग्य चाचण्यांशी निगडित अनेक खासगी लॅब कार्यरत आहेत. मात्र त्यांच्यावर नियंत्रण करणारी कोणतीही संस्था अस्तित्वात नाही. त्यामुळे या खासगी लॅबवर अंकुश आणण्यासाठी विधिमंडळाच्या येत्या अधिवेशनात कायदा आणणार असल्याची माहिती आरोग्यमंत्री प्रकाश आबिटकर यांनी दिली.
तसेच रूग्णांना जी औषधे मिळतात ती बोगस तर नाही ना हे तपासण्यासाठी आता एक खास मशिन खरेदी करण्यात आले आहे. त्यासाठी आता फलाईंग स्कॉड तयार करण्यात येणार असून या मशिनच्या सहायाने बोगस औषधे शोधून काढण्यात येणार आहेत. तसेच नॅशनल इन्स्टीटयूट ऑफ व्हायरोलॉजी (एनआयव्ही) च्या धर्तीवर महाराष्ट्र इन्स्टीटयूट ऑफ व्हायरोलॉजी (एमआयव्ही) ची स्थापना करण्यात येणार असून त्यासाठी ३६ कोटींची तरतूदही करण्यात आल्याचे त्यांनी सांगितले.
आरोग्यभवन येथे पत्रकारांशी संवाद साधताना प्रकाश आबिटकर यांनी आरोग्यखात्याकडून जे महत्वाचे निर्णय घेण्यात आले आहेत त्यांची माहिती दिली. राज्यात मोठया प्रमाणात विविध लॅब आहेत. पॅथोलॉजी पासून ते एक्स-रे, एमआरआय, सीटी स्कॅन आदी चाचण्या येथे होतात. पण या लॅबमध्ये मिळणारे रिपोर्ट हे अनेकदा चुकीचे असल्याच्या तक्रारी येत आहेत. अनेक ठिकाणी तर विविध लॅब मध्ये एकाच रूग्णाचे वेगवेगळे रिपोर्ट आल्याचेही प्रकार घडले आहेत.
लॅबच्या दरावर नियंत्रण येणार
लॅबच्या दरावरही कोणतेही नियंत्रण नाही. याची दखल आपण घेतली असून या लॅबवर नियंत्रण आणण्यासाठी येत्या विधिमंडळ अधिवेशनात एक कायदाच पारित करण्यात येणार आहे. त्याचे उल्लंघन केल्यास दंड तसेच कठोर शिक्षेचीही तरतूद असणार असल्याचे आबिटकर यांनी सांगितले.
बोगस औषधे शोधणारी मशिन
राज्य शासनाकडून जी थेट औषध खरेदी होते त्यात काही गैरप्रकार आढळत नाहीत. मात्र जिल्हापरिषदा-महापालिका स्तरावर होणा-या औषध खरेदीत बोगस औषधे आढळल्याचे प्रकार घडले आहेत. रूग्णांना योग्य तीच औषधे मिळाली पाहिजेत असा आपला कटाक्ष आहे. त्यासाठी महाराष्ट्र वैदयकिय वस्तू प्राधीकरणाच्या माध्यमातून ड्रग डिटेक्शन मशिन खरेदी करण्यात आली आहे. फलाईंग स्कॉडच्या माध्यमातून आमचे पथक विविध ठिकाणी भेटी देउन या मशिनच्या माध्यमातून औषधांची क्वालिटी तपासणार आहे. बोगस औषधे आढळल्यास योग्य ती कारवाई करण्यात येईल असे आबिटकर यांनी सांगितले.
प्राथमिक आरोग्य केंद्रातही
सर्पदंशावरील औषधे उपलब्ध
राज्यात आधी सर्पदंशावरील औषधांच्या उपलब्धतेत उणीवा होत्या. मात्र आता त्या पूर्णपणे दूर करण्यात आल्या आहेत. अगदी गावपातळीवरील प्राथमिक आरोग्य केंद्रातही सर्पदंशावरील औषधे उपलब्ध आहेत. तसेच तेथील डॉक्टर आणि नर्सेसना त्याच्या वापराबददल योग्य ते प्रशिक्षणही देण्यात आल्याचे आबिटकर यांनी सांगितले.
अडीच कोटी महिलांच्या आरोग्य तपासणीचे लक्ष्य
महिलांचे आरोग्य सक्षम राहावे यासाठी विशेष मोहिम हाती घेण्यात आली आहे. राज्यात अडीच कोटी महिलांच्या आरोग्य तपासणीचे लक्ष्य ठेवण्यात आले आहे. त्यातील १ कोटी महिलांचे स्क्रिनिंग पूर्ण झाले आहे. त्यातील १३ हजार महिलांना विविध आजार आढळून आले आहेत. त्यावर उपचारही सुरू झाले आहेत. प्रिव्हेंटिव्ह कार्यक्रमाच्या अंतर्गत या तपासण्या करण्यात येत आहेत. जेणेकरून आजार अगदी प्राथमिक अवस्थेतच आढळल्यानंतर त्यावरील उपचार सोपे जातात असेही आबिटकर म्हणाले.
