कोल्हापूर : ऊस उत्पादक शेतक-यांच्या विविध मागण्यांसाठी स्वाभिमानी शेतकरी संघटनेने पुकारलेले महामार्ग रोको आंदोलन आज सलग दुस-या दिवशीही सुरूच आहे. पुणे-बेंगलोर राष्ट्रीय महामार्गावर कोगनोळीपासून हावेरीपर्यंत हजारो शेतकरी रस्त्यावर ठाण मांडून बसले असून आंदोलनाची भूमिका स्पष्ट करताना राजू शेट्टी म्हणाले, काल सकाळी ११ वाजल्यापासून महामार्ग रोखून धरलेला आहे. प्रवाशांची गैरसोय होत आहे, त्याबद्दल मी त्यांची माफी मागतो. पण केंद्र सरकारसोबत ४ तास डोकेफोड करूनही काहीही साध्य झाले नाही. २४ तास उलटूनही निर्णय झालेला नाही. नाक दाबल्याशिवाय तोंड उघडत नाही या न्यायाने दुर्दैवाने आम्हाला हा रस्ता रोखण्याचा निर्णय घ्यावा लागला.
रस्त्यावर अडकलेल्या वाहनचालकांबाबत संवेदनशीलता दाखवत शेट्टी यांनी स्थानिक शेतक-यांना मोठे आवाहन केले. महामार्गावर बाहेरच्या राज्यातून आलेले अनेक ट्रक आणि कंटेनर ड्रायव्हर अडकले आहेत. त्यांची उपासमार होता कामा नये. त्यांच्या चहा-जेवणाची व्यवस्था करा. व्यवस्था होत नसेल तर संघटनेशी संपर्क साधा, आम्ही शिधा पुरवू. पण महाराष्ट्र आणि कर्नाटकचे आतिथ्य आपण दाखवून दिले पाहिजे असे ते म्हणाले.
सरकारची चालढकल
शेट्टींनी केंद्र सरकारच्या धोरणावर जोरदार प्रहार केला. सरकारच्या तिजोरीवर एक रुपयाचाही बोजा पडणार नाही, एवढीच आमची मागणी आहे. ६० रुपयांनी विकल्या जाणा-या साखरेची ५० रुपयांची हमी आम्हाला हवी आहे. तसेच, इथेनॉलमधून मिळणारा पैसा कारखान्यांमार्फत शेतक-यांना द्यावा. गेल्या वर्षभरात ऑईल कंपन्यांनी १ लाख ५० हजार कोटी रुपयांचा नफा कमावला, ज्यातील बहुतांश वाटा इथेनॉलचा आहे. आपल्या जीवावर बाकीचे चैन करत आहेत आणि आपण रस्त्यावर आहोत अशी खंत त्यांनी व्यक्त केली. उत्तर प्रदेशचे उदाहरण देत त्यांनी साखरेच्या दरातून कसा काळा पैसा निर्माण होत आहे, हेही स्पष्ट केले.
शेतक-यांनो, एकजूट राहा
शेतक-यांना एकजूट राहण्याचे आवाहन करताना शेट्टी म्हणाले, जोपर्यंत आपल्या शेतात ऊस आहे, तोपर्यंत आपल्याला किंमत आहे. शेतक-यांनी आपला ऊस फक्त ८-१० दिवस शेतातच ठेवावा. नवीन साखर तयार झाली नाही तर बाजारात साखर येणार नाही आणि बरोबर केंद्र सरकारची कोंडी होईल. हे एक ऐतिहासिक आंदोलन असून कोट्यवधींचा घोटाळा करणा-यांना अद्दल घडवण्याची हीच योग्य वेळ आहे. आता हे आंदोलन किती दिवस चालणार आणि केंद्र सरकार शेतक-यांच्या मागण्यांबाबत काय निर्णय घेणार, याकडे लक्ष लागून आहे.
