मांड्या : कर्नाटकातील मांड्या येथे ८ वर्षांच्या मुलीवर अत्याचार झाल्याची घटना समोर आली आहे. दोन्ही आरोपी एकत्र शिक्षण घेतात. ते प्रथम मुलीला शाळेच्या बाथरूममध्ये घेऊन गेले. मुलीला धमकी देऊन तिचे कपडे काढून टाकण्यात आले. ही घटना ३१ जानेवारी रोजी घडली होती, पण हे प्रकरण रविवारी उघडकीस आले. जेव्हा मुलीच्या आईने पोलिसांत तक्रार दाखल केली.
एका वरिष्ठ पोलिस अधिका-याने दिलेल्या माहितीनुसार, अल्पवयीन पीडित मुलगी दुसरीच्या वर्गात शिकते. आरोपींपैकी एक तिचा वर्गमित्र आहे तर दुसरा दुस-या वर्गातला आहे. मुलीने आरोप केला आहे की आरोपी विद्यार्थ्यांनी तिला घटनेबद्दल कोणालाही न सांगण्याची धमकी दिली होती, परंतु तिने नंतर तिच्या आईला याबद्दल सांगितले. मंड्याचे एसपी मल्लिकार्जुन बालदंडी म्हणाले की, मुलीच्या जबाबाच्या आधारे दोन्ही मुलांविरुद्ध गुन्हा दाखल करण्यात आला आहे.
पोलिस शाळेच्या कॅम्पसमध्ये बसवलेल्या सीसीटीव्ही फुटेजची तपासणी करत आहेत. तथापि, पोलिसांनी सांगितले की मुलीच्या वैद्यकीय अहवालात तिच्या गुप्तांगावर अशा कोणत्याही जखमा आढळल्या नाहीत. मुलांचे जबाब नोंदवले जातील आणि त्यानुसार पुढील कारवाई केली जाईल. एसपी म्हणाले की, आम्ही सध्या या प्रकरणाची चौकशी करत आहोत आणि मुलीने दिलेल्या जबाबाची पडताळणी करत आहोत. त्यांच्या विधानात काही विरोधाभास आहेत.
भाजपचे प्रदेशाध्यक्ष बीवाय विजयेंद्र यांनी सोशल मीडिया प्लॅटफॉर्म एक्सवर या घटनेचा निषेध केला आणि राज्यातील कायदा आणि सुव्यवस्थेची परिस्थिती पूर्णपणे बिघडली आहे आणि अल्पवयीन मुलींवर बलात्कार, महिलांवर हल्ला आणि दिवसाढवळ्या लुटमारीच्या घटना घडत आहेत असा आरोप केला. गुन्हेगारांवर कडक कारवाई करावी अशी मागणी त्यांनी केली.
