सोलापूर/लातूर: देशभरात खळबळ उडवून देणाऱ्या नीट पेपरफुटी प्रकरणात लातूरच्या आरसीसी क्लासेसचे संचालक प्रा. शिवराज मोटेगावकर यांना सीबीआयने अटक केल्यानंतर त्याचे गंभीर परिणाम आता सर्वत्र उमटताना दिसत आहेत. या कारवाईमुळे केवळ लातूरच नव्हे, तर सोलापूरसह राज्यातील विविध भागांत मोटेगावकर यांच्याशी संबंधित असलेल्या खासगी शिक्षण संस्थांचे धाबे दणाणले आहेत.
सोलापूर शहरात शिवराज मोटेगावकर यांच्या नावाने सुरू असलेली खासगी शिक्षण संस्थेची शाखा प्रशासनाने किंवा संबंधित चालकांनी तडकाफडकी बंद केली आहे. अचानक क्लास बंद झाल्यामुळे तेथे शिकणाऱ्या विद्यार्थ्यांमध्ये प्रचंड संभ्रम निर्माण झाला असून पालकांमध्ये चिंतेचे वातावरण आहे. यासंदर्भात स्थानिक संस्था चालकांशी संपर्क साधण्याचा प्रयत्न केला असता तो अयशस्वी ठरला आहे.
नीटच्या तयारीसाठी लातूर हे मुख्य केंद्र मानले जाते. या पेपरफुटी प्रकरणानंतर लातूरमध्ये वास्तव्यास असलेल्या शेकडो विद्यार्थ्यांचे शैक्षणिक भवितव्य टांगणीला लागले आहे. मिळालेल्या माहितीनुसार पेपरफुटीच्या बातम्या आणि क्लासेसवर होणाऱ्या कारवाईमुळे लातूरमध्ये वास्तव्यास असलेल्या ५०० हून अधिक विद्यार्थ्यांनी अभ्यासाचे ठिकाण सोडून आपल्या मूळ गावी परतणे पसंत केले आहे. यामुळे या विद्यार्थ्यांचे शैक्षणिक नुकसान होण्याची भीती व्यक्त केली जात आहे.
या प्रकरणात आतापर्यंत ११ जणांना अटक करण्यात आली असून त्यात महाराष्ट्रातील सात जणांचा समावेश आहे. सीबीआयच्या तपासातून धक्कादायक माहिती समोर येत आहे. तपासात शिवराज मोटेगावकर हे पेपरफुटीच्या कटातील एक मुख्य दुवा असल्याचे समोर आले आहे. नीट पेपर सेट करण्याच्या प्रक्रियेत सहभागी असलेले लातूरचे निवृत्त प्राध्यापक पी. व्ही. कुलकर्णी यांच्याशी मोटेगावकर यांचे घनिष्ठ संबंध होते. त्यांच्यामार्फतच पेपर लीक झाल्याचा संशय सीबीआयला आहे. सीबीआयने केलेल्या छापेमारीत मोटेगावकर यांच्या लॅपटॉप, मोबाईल आणि कार्यालयातून पेपरफुटीशी संबंधित संशयास्पद कागदपत्रे आणि काही प्रश्नपत्रिका जप्त करण्यात आल्या आहेत. विशेष न्यायालयाने मोटेगावकर यांना पोलीस कोठडी सुनावली असून त्यांच्या कोठडीत वाढ करण्यात आली आहे.
तपास यंत्रणांच्या मते ३ मे २०२६ रोजी झालेल्या नीट परीक्षेपूर्वीच मोटेगावकर यांनी काही विद्यार्थ्यांना पेपरची प्रत उपलब्ध करून दिली होती. विशेषतः केमिस्ट्री विषयाच्या ४५ पैकी ४३ प्रश्न आरसीसीच्या गेस पेपरशी तंतोतंत जुळले होते, ज्यामुळे हा गैरप्रकार उघडकीस आला.
एकेकाळी अभ्यासाचे महत्त्वाचे केंद्र म्हणून ओळखल्या जाणाऱ्या लातूर पॅटर्नला या घटनेमुळे मोठा धक्का बसला आहे. सोशल मीडियावर मोटेगावकर यांचे जुने व्हिडिओ व्हायरल होत असून त्यात ते पेपरफुटीच्या विरोधात भूमिका मांडताना दिसत आहेत. मात्र, आता स्वतःच त्याच प्रकरणात अडकल्याने या घटनाक्रमाची मोठी चर्चा राजकीय आणि शैक्षणिक वर्तुळात रंगली आहे.
सीबीआयचा तपास सध्या अत्यंत संवेदनशील टप्प्यावर असून या रॅकेटमध्ये अजूनही मोठे मासे गळाला लागण्याची शक्यता वर्तवली जात आहे. विद्यार्थ्यांचे शैक्षणिक नुकसान टाळण्यासाठी प्रशासन आणि संबंधित संस्था काय भूमिका घेतात, याकडे सर्वांचे लक्ष लागले आहे. या प्रकरणातील तपासाचे धागेदोरे रोज नवनवीन खुलासे करत आहेत, त्यामुळे अधिकृत माहितीसाठी तपास यंत्रणांच्या प्रसिद्धीपत्रकांकडे लक्ष ठेवावे.
