जळगाव : प्रतिनिधी
महाराष्ट्रातील जळगावमध्ये दोन गटांत दगडफेक झाल्याची घटना समोर आली आहे. शिवसेनेचे मंत्री गुलाबराव पाटील यांच्या कुटुंबीयांना घेऊन जाणा-या वाहनाने हॉर्न वाजवल्याने दोन गटांत तणाव वाढला.
मिळालेल्या माहितीनुसार, जळगाव जिल्ह्यातील पालधी गावात मंगळवारी रात्री दगडफेक आणि जाळपोळ झाल्याची घटना घडली.
मंत्री गुलाबराव पाटील यांच्या कुटुंबीयांना घेऊन जाणा-या वाहनाच्या चालकाने हॉर्न वाजवल्याने वादाला सुरुवात झाली. यानंतर ग्रामस्थ आणि कार्यकर्त्यांमध्ये बाचाबाची झाली.
संतप्त जमावाने दगडफेक करत दुकाने आणि वाहनांना आग लावली. जळगावातील विविध भागात मोठा पोलिस बंदोबस्त तैनात करण्यात आला आहे. पोलिसांनी सुमारे २५ जणांवर गुन्हा दाखल केला असून सुमारे १० जणांना ताब्यात घेतले आहे.
