धाराशिव : प्रतिनिधी
धाराशिव जिल्ह्यात उभारण्यात आलेल्या सोलर व पवनचक्की प्रकल्पातील साहित्याची चोरी होण्याच्या घटना मागील अनेक दिवसापासून मोठ्या प्रमाणात सुरु आहेत. त्यातील १० गुन्हे उघडकीस आणण्यात पोलिसांना यश आले आहे. रविवारी (दि.७) २ आरोपींना येडशी येथून मुद्देमालासह पकडण्यात आले आहे. यावेळी त्यांच्याकडून १९५ किलो तांब्याच्या तारासह टाटा सुमो गाडी असा ६ लाख ४२ हजार ४०० रूपयांचा मुददेमाल जप्त करण्यात आला आहे. ही कारवाई स्थानिक गुन्हे शाखेच्या पथकाने केली आहे.
धाराशिव जिल्हयातील सोलार प्लॅट व पचनचक्कीचे संबंधीत असणा-या प्रकल्पातून तेथील साहित्य, वायर, चोरीस जाण्याचे प्रकार मोठ्या प्रमाणात घडले होते. अशाच प्रकारचे काही गुन्हे धाराशिव गुन्हे अभिलेखावर नोंद असल्याने व सदरचे गुन्हे अतिसंवेदनशील व गंभीर स्वरूपाचे असल्याने पोलीस अधीक्षक रितू खोखर यांनी हे गुन्हे उघडकीस आणण्याबाबत स्थानिक गुन्हे शाखेचे प्रभारी अधिकारी पोनि विनोद इज्जपवार यांना आदेशित केले होते. त्यानुसार रविवारी (दि.७) स्थानिक गुन्हे शाखेचे सपोनि कासार व पथक यांनी गोपनीय बातमीदार यांचेकडून प्राप्त माहितीवरून येडशी (ता. जि धाराशिव) येथून ०२ संशयित इसमांना त्यांचे टाटा सुमो वाहनासह शिताफीने ताब्यात घेतले. ताब्यात घेतलेल्या आरोपींकडे चौकशी केली असता त्यांनी त्यांचे अन्य साथीदारांचे सोबत मिळून चोरी केली असल्याचे कबूल केले. ताब्यात घेतलेल्या आरोपींकडून एकूण १९५ किलो वजनाच्या तांब्याच्या तारा व गुन्हयात वापरलेली टाटा सुमो असा एकूण ०६,४२,४०० रूपयांचा मुददेमाल ताब्यात घेण्यात आला आहे. नमुद आरोपींकडून चोरीचे एकूण १० गुन्हे उघडकीस आले आहेत.
अटक करण्यात आलेल्या आरोपींची नावे शिवाजी उर्फ नाना संजय काळे रा खामकर पारधी पेढी, ता वाशी, जि धाराशिव व अन्य एक विधीसंघर्षग्रस्त बालक अशी असून नमुद आरोपी व जप्त मुददेमाल पुढील कारवाईस्तव पोस्टे धाराशिव ग्रामीण यांचे ताब्यात देण्यात आले आहे. सदरची कामगिरी स्थानिक गुन्हे शाखेचे पोनि विनोद इज्जपवार, सपोनि सुदर्शन कासार, पोह शौकत पठाण, पोह प्रकाश औताडे, पोह जावेद काझी, पोह फरहान पठाण, पोकॉ १०२९ कोळी, चापोह रत्नदिप डोंगरे, नागनाथ गुरव यांचे पथकाने केली आहे.
या ठिकाणाहून केली चोरी
या चोरट्यांनी धाराशिव जिल्ह्यातील विविध पोलीस ठाणे अंतर्गत असलेल्या तेरखेडा (ता. वाशी), रूईभर, कौडगाव, ढोकी, साबळेवाडी (ता. धाराशिव) व आरसोली (ता. भूम), गौरगाव व मस्सा (ता. कळंब) या शिवारात सोलर तसेच पवनचक्की प्लांटवरील तांब्याच्या तारा व केबलची चोरी केल्याचे सांगितले.
