मुंबई : दिवाळीची चाहुल लागताच पर्यटनाचे आप्तस्वकीयांकडे गावी जाण्याचे वेध लागतात. सुटीमध्ये फिरण्याचे नियोजन करणा-या प्रवाशांना आता रस्ते प्रवासासाठी अधिक पैसे खर्च करावे लागणार आहे. आजपासून एसटी तिकीट दरात दहा टक्के दरवाढ लागू झाली असून, खासगी बसने यापूर्वीच दरवाढ लागू केली आहे.
ऐन थंडीत प्रवासाचा थकवा कमी जाणवत असल्याने दिवाळी सुट्टीत तीर्थाटन आणि पर्यटन वाढते. दिवाळीच्या हंगाम सुरू झाल्यानंतर डिसेंबरपर्यंत हंगाम मानला जातो. कोल्हापूर-पंढरपूरसाठी प्रवाशांना एसटीच्या वातानुकूलित सेवेतून ९७० रुपये मोजावे लागणार आहे. खासगी वातानुकूलित बससेवेसाठी हाच दर एक हजार ते दीड हजारांपर्यंत आहे. मुंबईतून कोकणासह गोव्यात जाण्यासाठी खासगी बसचा दर तीन हजारांपार गेला आहे. एसटीने या मार्गाच्या प्रवासासाठी १,१५० ते १,२५५ रुपये मोजावे लागणार आहे. खासगीच्या तुलनेत एसटी प्रवास स्वस्त हाच दिलासा प्रवाशांना म्हणण्याची वेळ आली आहे.
दिवाळीतील गर्दीच्या हंगामात महसूल वाढीसाठी २७ नोव्हेंबरपर्यंत तात्पुरती भाडेवाढी एसटी गाड्यांमध्ये लागू करण्यात आली आहे. दिवाळी हंगामापूर्वी आरक्षण केलेल्या प्रवाशांना आरक्षण तिकीट आणि वाढीव भाडेदर यांतील फरकाचे पैसे प्रवास करताना वाहकांकडे द्यावे लागणार आहे, असे एसटी महामंडळाने स्पष्ट केले आहे.
गाडीच्या सुट्ट्या भागांच्या किंमती, इंजिन ऑइलसह देखभाल खर्च वाढला आहे. चालक आणि क्लिनर यांचा पगार आणि सगळा खर्च बस मालकच उचलतात. खासगी बसला सरकारकडून कोणत्याही प्रकारची आर्थिक मदत किंवा पथकरातून सूट मिळत नाही. प्रवाशांना दर्जेदार सुविधा देण्यासाठी गाडीत विशेष स्वच्छता आणि प्रवासी सुरक्षितता पुरवण्यात येते, यामुळे खासगी बस चालकांकडून हंगामासाठी दरवाढ करण्यात येते, असे स्पष्टीकरण दादरमधील बस चालकांनी दिले आहे.
खासगी बस गाड्यांना एसटी तिकीट दरांच्या दीडपट अधिक भाडे आकारण्यास मुभा आहे. खासगी बस चालकांनी अधिक भाडे मागितल्यास त्याची पावती घेऊन परिवहन आयुक्तालयात तक्रार दाखल करावी. दोषी खासगी बस चालकांवर कारवाई करण्यात येणार आहे, असे परिवहन आयुक्तालयाकडून स्पष्ट करण्यात आले आहे.
