मुंबई : प्रतिनिधी
स्वारगेट बस स्थानक अत्याचार प्रकरणी सुरक्षेत हलगर्जीपणा केल्याप्रकरणी चार अधिका-यांना निलंबित करण्यात आल्याचे परिवहनमंत्री प्रताप सरनाईक यांनी विधानसभेत घोषित केले. निलंबित करण्यात आलेल्या अधिका-यांमध्ये वरिष्ठ आगार व्यवस्थापक जयेश पाटील, कनिष्ठ आगार व्यवस्थापक पल्लवी पाटील, सहाय्यक वाहतूक निरीक्षक सुनिल येळे व सहाय्यक वाहतूक अधिक्षक मोहिनी ढगे यांचा समावेश आहे. तर आगारात त्यावेळेस असणारे २२ सुरक्षा रक्षक बदलण्यात आले असल्याचेही सरनाईक यांनी सांगितले.
यापुढे प्रवाशांच्या सुरक्षेबाबत विशेषत: महिला प्रवाशांच्या सुरक्षेबाबत कोणीही हलगर्जीपणा केल्यास संबंधित कर्मचारी अधिका-यांना अशाच प्रकारच्या शिक्षेला सामोरे जावे लागेल, असा इशाराही सरनाईक यांनी दिला. स्वारगेट बस स्थानकात २५ फेब्रुवारी रोजी उभ्या असलेल्या शिवशाही बसमध्ये एका तरुणीवर बलात्कार झाला होता. त्याच दिवशी परिवहन मंत्री प्रताप सरनाईक यांनी विभागाच्या अधिका-यांना चौकशी करून अहवाल सादर करण्याच्या सूचना केल्या होत्या. हा अहवाल मंगळवारी सरकारला प्राप्त झाल्यानंतर सरनाईक यांनी याप्रकरणी विधानसभेत निवेदन केले.
बलात्काराच्या घटनेनंतर कर्तव्यावर असलेले स्थानक प्रमुख, आगार प्रमुख यांची प्रवाशांच्या सुरक्षेबाबत हलगर्जीपणा दाखवल्याबद्दल विभागीय चौकशी करावी, या चौकशीत ते दोषी आढळल्यास त्यांना तात्काळ निलंबित करावे असे निर्देश प्रताप सरनाईक यांनी एसटी महामंडळाच्या व्यवस्थापकीय संचालकांना दिले होते. तसेच एसटी बस स्थानकात त्यावेळी कार्यरत असलेल्या २२ सुरक्षारक्षकांऐवजी दुसरे सुरक्षा रक्षक नियुक्त करण्याचे निर्देश दिले होते.
