बीड : शिक्षण विभागाकडून विशेष खबरदारी घेतल्यानंतरही दहावीचा इंग्रजी विषयाचा पेपर जिल्ह्यातील धारुर येथील जिल्हा परिषद शाळेच्या परीक्षा केंद्रातून शनिवार दि. १ मार्च रोजी सकाळी फुटला. पेपर सुरू झाल्यानंतर सकाळी साडेअकरा वाजता दोघांनी एका हॉलच्या खिडकीतून पेपर घेऊन पलायन केले.
दरम्यान, पोलिस निरीक्षक देविदास वाघमोडे यांनी अतिशय शिताफीने अवघ्या अर्ध्या तासात पेपर फोडणा-या दोघांनाही ताब्यात घेतले असून त्यांच्याकडून पेपर जप्त केला आहे. शहरातील जिल्हा परिषद शाळेतील परीक्षा केंद्रावर दहावीची परीक्षा सुरू आहे. आज इंग्रजी विषयाचा पेपर आहे. सकाळी साडेअकरा वाजता केंद्रातील एका हॉलच्या खिडकीतून इंग्रजीचा पेपर घेऊन दोघांनी पलायन केले.
माहिती मिळताच पोलिस निरीक्षक देविदास वाघमोडे यांनी लागलीच तपास सुरू केला. त्यानंतर अवघ्या अर्ध्या तासात फोडणा-या दोघांना पोलिसांनी ताब्यात घेतले. पोलिसी खाक्या दाखवताच घेऊन पळालेला इंग्रजी विषयाचा पेपर त्यांनी पोलिसांकडे सुपूर्द केला.
दरम्यान, पेपर सुरू होताच अर्ध्या तासांत फुटला. त्यामुळे पालकांमध्ये संभ्रमाचे वातावरण आहे. शिक्षणाधिकारी मनोज कोल्हे यांनी पेपर फोडणा-यांवर योग्य ती कारवाई केली जाईल असे स्पष्ट केले. तसेच या प्रकाराची शिक्षण विभागातील वरिष्ठांना माहिती दिली असल्याचे कोल्हे यांनी सांगितले.
पेपर फूटी मागे कोण? याचा तपास : पोलिस
जिल्हा परिषद शाळेतील परीक्षा केंद्रातून दहावीच्या इंग्रजी विषयाचा पेपर घेऊन दोघे पळाले होते. त्या दोन तरुणांना आम्ही ताब्यात घेतले आहे. या पाठीमागे आणखीन कोण आहे? पेपर फोडणारी साखळी आहे का? या दृष्टिकोनातून तपास करण्यात येत असल्याची माहिती पोलिस निरीक्षक देवीदास वाघमोडे यांनी दिली आहे.
