सोलापूर : बार्शी शहरातील बार्शी-परांडा रस्त्यावर भरदिवसा रस्त्यावर पतीने पत्नीवर चाकूने सपासप वार करून खून केल्याची घटना सोमवार दि. २५ मे रोजी घडली. धनश्री ऋषिकेश पाटील(२४ वर्षे)असे खून झालेल्या महिलेचे नाव असून ऋषिकेश पाटील (३० ) यांनी हे कृत्य केले आणि शेवटी स्वत:हून बार्शी शहर पोलिस ठाण्यात हजर होऊन पोलिसांत आत्मसमर्पण केले.
या घटनेमुळे शहरात भीतीचे वातावरण निर्माण झाले आहे. पत्नीवरील चारित्र्याच्या संशयावरून हे खून प्रकरण घडले असल्याचा पोलिसांचा अंदाज आहे. मिळालेल्या माहितीनुसार, ऋषिकेश पाटील हा बजाज फायनान्समध्ये तर धनश्री पाटील या आय.डी.एफ.सी बँकेत नोकरीला आहेत. काही महिन्यांपूर्वीच त्यांनी प्रेमविवाह केला होता. मात्र, गेल्या काही दिवसांपासून दोघांमध्ये कौटुंबिक वाद सुरू असल्याची माहिती समोर येत आहे. आज सकाळी बार्शी-परंडा रोडवर दोघांमध्ये पुन्हा वाद झाला. हा वाद अचानक चिघळल्यानंतर रागाच्या भरात ऋषिकेशने पत्नी धनश्रीवर चाकूने सपासप वार करण्यास सुरुवात केली. सदर घटना पाहिलेल्या नागरिकांनी ऋषिकेशला थांबविण्याचा प्रयत्न केला मात्र हस्तक्षेप करणा-यांना ऋषिकेशने शिवीगाळ केली आणि चाकूचा धाक दाखविल्याचे सांगितले. त्यामुळे प्रत्यक्षदर्शींना बघ्याची भूमिका घेण्याशिवाय पर्याय नसल्याचे पोलिसांनी सांगितले.
आरोपी स्वत:हून बार्शी ग्रामीण पोलिस ठाण्यात हजर
आरोपीने पत्नीवर तब्बल ५० वार केल्याचा प्राथमिक अंदाज आहे. गंभीर जखमी झालेली धनश्री भर रस्त्यावरच रक्ताच्या थारोळ्यात कोसळली घटनेनंतर आरोपी ऋषिकेश पाटील स्वत:हून बार्शी ग्रामीण पोलिस ठाण्यात हजर झाला. पोलिसांनी त्याला ताब्यात घेतले असून पुढील चौकशी सुरू आहे. या प्रकरणी गुन्हा दाखल करण्याची प्रक्रिया सुरू असून घटनेमागील नेमके कारण शोधण्याचे काम सुरू असल्याचे पोलिसांनी सांगितले.
सहा वर्षांचा चिमुकला झाला पोरका
धनश्री आणि ऋषिकेश यांचा २०१८ मध्ये प्रेमविवाह झाला होता. त्यांना ६ वर्षांचा एक मुलगाही आहे. सुरुवातीची ४ ते ५ वर्ष सुखी संसार चालला नंतर अधून मधून भांडणे होऊ लागली. आरोपी ऋषीकेषला दारूचे व्यसन लागले होते. तो धनश्रीला सतत चारित्र्याच्या संशयावरून मारहाण आणि शिवीगाळ करत असल्याची माहिती सूत्रांनी दिली. धनश्रीची आई आजारी असल्याने ती उपचारासाठी वारंवार माहेरी जात होती. याच कारणावरूनही ऋषीकेष व तिच्याशी वाद होत होता.
