नवी दिल्ली : नासाचे प्रमुख बिल नेल्सन यांनीही भारताच्या चांद्रयान-३ मोहिमेच्या यशाचे कौतुक केले आहे. ते सध्या भारत दौऱ्यावर आहेत. प्रसारमाध्यमांशी संवाद साधताना ते म्हणाले की, भारताने असे काही केले आहे जे इतर कोणत्याही देशाने केले नाही. त्यामुळेच या कामगिरीबद्दल ते सर्वांच्या कौतुकास पात्र आहेत. माझ्याकडून भारताचे अभिनंदन. चंद्राच्या दक्षिण ध्रुवावरती उतरणारे तुम्ही पहिले आहात, इतरांनीही प्रयत्न केले आणि अयशस्वी झाले. पण भारताचा प्रयत्न यशस्वी झाला. या यशासाठी तुम्ही सर्वांच्या कौतुकास पात्र आहात, हे खूप महत्त्वाचे आहे.
बिल नेल्सन यांनी निसार मिशनचाही उल्लेख केला. त्यांनी सांगितले की पृथ्वीवर काय घडत आहे हे शोधण्यासाठी, संपूर्ण ३ डी संमिश्र मॉडेल स्थापित करण्यासाठी चार प्रमुख वेधशाळांची उपलब्धी एकत्रित केली जाईल. आम्ही भारतासोबत स्थापन केलेली ही प्रमुख वेधशाळा आहे. पृथ्वीवर प्रत्यक्षात काय घडत आहे याचे संमिश्र मॉडेल असणार आहे. ते म्हणाले आम्हाला आमचे घर जपायचे आहे. निसार, नासा आणि इसरो यांची संयुक्त पृथ्वी-निरीक्षण मोहीम असून संशोधकांना पृथ्वीच्या जंगलात आणि पाणथळ परिसंस्थेतील बदलांचा जागतिक कार्बन चक्र आणि हवामान बदलांवर कसा परिणाम होत आहे हे शोधण्यात मदत करेल.
नासाचे प्रमुख बिल नेल्सन म्हणाले की, ते पुन्हा चंद्रावर जात आहेत आणि यावेळी त्यांच्यासोबत आंतरराष्ट्रीय भागीदार असतील. चंद्रावर अंतराळवीरांसह पहिल्या मोहिमेवर एक आंतरराष्ट्रीय संघ असेल. ते म्हणाले की, भविष्यात भारतातून विस्तारित व्यावसायिक गुंतवणुकीची प्रचंड संधी आहे.
