६ जणांचा मृत्यू, २०० जखमी; १० मजली इमारत झुकली
ढाका : वृत्तसंस्था
बांगलादेशात आज सकाळी १० वाजून ८ मिनिटांनी ५.७ रिश्टर स्केलचा भूकंप झाला. यामध्ये ६ जणांचा मृत्यू झाला आणि २०० हून अधिक जण जखमी झाले. भूकंपाचे केंद्र ढाक्यापासून फक्त २५ किलोमीटर अंतरावर असलेल्या नरसिंगडी येथील माधाबादीत होते. भूकंपाचा धक्का इतका जोरात होता की १० मजली इमारत एका बाजूला झुकली. भूकंपामुळे बांगलादेशात सुरू असलेला बांगलादेश-आयर्लंड आंतरराष्ट्रीय क्रिकेट सामनाही थांबवण्यात आला.
भूकंपाच्या जोरदार धक्क्याने आज बांगलादेश हादरला. गाझीपूरमधील श्रीपूर येथे भूकंपादरम्यान एक मोठा अपघात झाला. बहुमजली इमारतीतून बाहेर पडण्याचा प्रयत्न करणा-या घाबरलेल्या कामगारांचा एकच गोंधळ उडाला. त्यामुळे येथे चेंगराचेंगरी झाली. यात १५० हून अधिक कामगार जखमी झाले. डेनिमेक नावाच्या कापड कारखान्यात ही घटना घडली. जखमींना श्रीपूर उपजिल्हा आरोग्य केंद्रात दाखल करण्यात आले. भूकंप झाल्यानंतर अधिका-यांनी कारखान्याचे मुख्य गेट उघडण्यास नकार दिल्याची तक्रार कामगारांनी केली. ज्यामुळे घबराट पसरली. यातून अनेकजण जखमी झाले. याचवेळी भारतात कोलकात्यातही भूकंपाचे धक्के जाणवले.
