शिक्रापूर : शिक्रापूरचे माजी उपसरपंच व शिवसेना शिंदे गटाचे जिल्हा सल्लागार दत्तात्रय बंडू गिलबिले (वय ५१) यांची धारदार हत्याराने निर्घृण हत्या करण्यात आल्याची घटना रविवारी (दि. १) दुपारी सव्वाबाराच्या सुमारास त्यांच्या घराजवळ घडली.
दत्तात्रय गिलबिले हे दुपारच्या वेळेस आपल्या बंगल्याच्या आवारात खुर्चीमध्ये बसलेले असताना आरोपींनी धारदार शस्त्राने त्यांच्या मानेवर वार केले. दरम्यान घटनेनंतर त्यांना तात्काळ पुणे येथे खासगी रुग्णालयात नेत असताना त्यांचा मृत्यू झाला. गिलबिले यांच्या हत्येची बातमी समजताच शिक्रापूरमध्ये एकच खळबळ उडाली.
मालमत्ता अथवा इतर कारणांमधून ही हत्या झाल्याची प्राथमिक माहिती शिक्रापूर पोलिसांनी दिली आहे. हल्लेखोर यांची नावे व संख्या निष्पन्न झाली असून पोलिस पथक त्यांच्या मागावर असल्याची माहिती पोलिस निरीक्षक दीपरत्न गायकवाड यांनी दिली. दरम्यान शिक्रापूर परिसरात घडलेल्या या घटनेनंतर आरोपींना तात्काळ अटक करण्याची मागणी होत आहे.
