जळकोट : ओमकार सोनटक्के
डॉक्टर, इंजिनिअर व वकिलांप्रमाणे आता शिक्षकांच्या नावापुढेही इंग्रजी भाषेत विद्यार्थी टीआर तर मराठीत ‘टी’ असे संबोधन लिहिता येणार आहे. तसेच शिक्षकांना ड्रेस कोड राहणार असल्याचा महत्त्वपूर्ण निर्णय शालेय शिक्षण विभागाने नुकताच घेतला आहे. त्यामुळे आता राज्यातील सर्व व्यवस्थापनांच्या शाळेंतर्गत कार्यरत शिक्षकांच्या नावापूर्वी इंग्रजी भाषेत टीआर तर मराठी भाषेत ‘टी’ असे संबोधन लावण्यात येणार आहे. या संदर्भातील बोधचिन्ह पुणे येथील शिक्षण आयुक्त यांनी सुनिश्चीत केले आहे. त्यामुळे हे संबोधन व बोधचिन्ह शिक्षकांना त्यांच्या वाहनावरही लावता येणार आहे.
शिक्षक हे भावी पिढी घडवीत असतात, तसेच जनमानसात त्यांच्याकडे गुरू तसेच मार्गदर्शक म्हणून पाहिले जाते. सामान्यत: हे अनुकरणप्रिय असतात. त्यामुळे शिक्षकीय पदाची वेशभूषा ही महत्त्वाची असते. ही बाब विचारात घेता, राज्यातील स्थानिक स्वराज्य संस्था, खासगी, अल्पसंख्याक आदी सर्व व्यवस्थापना अंतर्गत अनुदानित, अंशत: अनुदानित, विनाअनुदानित. स्वयंअर्थसाहित तसेच अल्पसंख्याक व्यवस्थापनाच्या सर्व माध्यमांच्या व सर्व बोर्डाच्या शाळेतील कार्यरत शिक्षकांकरिता दैनंदिन पेहराव कशा पद्धतीचा असावा, याबाबत शालेय शिक्षण विभागाद्वारे मार्गदर्शक सूचना देण्यात आल्या आहेत.
शिक्षकांचा असा असेल ‘ड्रेस कोड’ शासन ज्या नवीन परिपत्रकानुसार सर्व शिक्षकांचा दैनंदिन पेहराव शिक्षकीय पदास अनुसरून असावा. सर्व शिक्षकांनी परिधान केलेला पेहराव हा व्यवस्थित असावा म्हणजेच महिला शिक्षकांनी साडी अथवा सलवार, चुडीदार, कुर्ता, दुपट्टा अशा पद्धतीने पेहराव करावा तसेच पुरुष शिक्षकांनी शर्ट आणि ट्राऊझर पॅन्ट, शर्ट इन करून परिधान केलेला असावा. गडद रंगाचे व चित्रविचीत्र नक्षीकाम अािण चित्रे असलेले पेहेराव परिधान करू नयेत तसेच शिक्षकांनी जीन्स व टी-शर्टचा वापर शाळेमध्ये करू नये. परिधान केलेला पेहराव स्वच्छ व नीटनेटका असावा, याची दक्षता सर्व शिक्षकांनी घ्यावी. शाळेने सर्व शिक्षकांकरिता एकच ड्रेस कोड ठरविण्यात यावा.
पुरुष व महिला शिक्षकांकरिता परिधान करावयाच्या पेरावाचा रंग कोणता असावा, हे संबंधित शाळेने निश्चीत करावे. पुरुष शिक्षकांनी परिधान करावयाच्या शर्टचा रंग हा फिकट असावा व पॅन्टचा रंग गडद असावा. महिला व पुरुष शिक्षकांनी पोषाखाला शोभतील, अशी पादत्राणे यांचा वापर करावा. स्काउट-गाईडच्या शिक्षकांना स्काऊट गाईडचे ड्रेस राहतील. वैद्यकीय कारण असेल तर पुरुषांना / महिलांना बूट वापरण्यातून सवलत देण्यात येणार आहे.
