जळगाव : प्रतिनिधी
पहलगाम दहशतवादी हल्ल्याचा बदला घेण्यासाठी भारताने ‘ऑपरेशन सिंदूर’ राबवून पाकिस्तान आणि पाकव्याप्त काश्मीरमधील ९ दहशतवादी तळ उडविले. दुसरीकडे या कारवाईनंतर सोन्याच्या किमतीने थेट आभाळ गाठले.
जळगावच्या सुवर्णपेठेत सलग तिस-या दिवशी वाढ झाली आहे. यामुळे जीएसटीसह सोन्याचा तोळा पुन्हा एकदा लाखाच्या वर गेला आहे.
जळगावच्या सराफ बाजारात बुधवारी देखील सोने दरात वाढ झाली. सोन्याचा दर ५०० रुपयांनी वाढला. यामुळे जळगावात आता २४ कॅरेट सोन्याचा दर विना जीएसटी ९७७०० (१००६३१) रुपयांवर पोहोचला आहे. तर चांदीचा दर ९८००० रुपयांवर आहे.
दरम्यान या आठवड्याच्या पहिल्या दिवशी सोने १८०० रुपयांनी वाढले होते. त्यानंतर मंगळवारी १४०० रुपयांनी तर बुधवारी ५०० रुपयांनी वाढले. यामुळे गेल्या तीन दिवसांत जळगावात सोन्याच्या दरात ३७०० रुपयांनी वाढ झाली आहे.
