लातूर : प्रतिनिधी
लातूर शहरासह जिल्हाभरातील विविध ठिकाणाहून १२ मोटारसायकली चोरणा-या दोघा आरोपींना स्थानिक गुन्हे शाखेच्या विशेष पथकाने अटक करून त्यांच्या जवळील १२ मोटारसायकली जप्त करण्यात आल्या आहेत. पोलीस अधीक्षक सोमय मुंडे यांचे आदेशान्वये अपर पोलीस अधीक्षक डॉ. अजय देवरे यांनी जिल्ह्यातील विविध पोलीस स्टेशनला घडलेले मालाविषयक गुन्हे उघडकीस आणण्याकरिता पोलीस अधिकारी व अंमलदार यांना सूचना व मार्गदर्शन करण्यात आले होते.
पोलीस स्टेशनला दाखल असलेल्या विशेषत: मोटारसायकल चोरीचे गुन्हे उघडकीस आणण्याकरिता विशेष पथके स्थापन करून गुन्हे उघड करण्याचे प्रयत्न सुरू होते. त्या अनुषंगाने पोलीस निरीक्षक स्थानिक गुन्हे शाखाचे पोलीस निरीक्षक संजीवन मिरकले यांचे नेतृत्वात सदर पथके माहितीचे संकलन करीत असताना, माहिती घेत असताना पथकाला मिळालेल्या माहिती वरून श्रीरंग लक्ष्मण सारगे (वय ५०) रा. गव्हाण ता. निलंगा, जि. लातूर व गोवर्धन व्यंकटी काळे (वय ३४) रा. अंबाजोगाई रोड अहमदपूर या दोघांना त्यांनी चोरलेल्या मोटारसायकलीसह ताब्यात घेण्यात आले. त्यांच्या कडे असलेल्या एकूण बारा मोटारसायकलसह ताब्यात घेऊन मोटार सायकल संदभनि विचारपूस केली असता सदरच्या मोटरसायकली ह्या लातूर जिल्ह्यातील वेगवेगळ्या ठिकाणाहून चोरी केले असल्याचे सांगितले. दरम्यान, चोरीच्या मोटारसायकली एकूण किंमत २ लाख ८५ हजार रुपयाचा मुद्देमाल हस्तगत करण्यात आला.
पोलीस ठाणे शिवाजीनगर येथील मोटरसायकल चोरीचे दोन गुन्हे, पोलीस ठाणे विवेकानंद चौक येथील मोटार सायकल चोरीचे दोन गुन्हे, तर पोलीस ठाणे गांधी चौक, निलंगा, अहमदपूर व चाकूर येथील प्रत्येकी एक गुन्हा असे एकूण ०८ मोटरसायकल चोरीचे गुन्हे उघडकीस आले असून उर्वरित चार मोटार सायकल बाबत तपास सुरू आहे. याप्रमाणे नमूद आरोपीनी चोरलेल्या मोटारसायकली जप्त करण्यात आले असून असून दोन आरोपींना अटक करण्यात आली आहे. पुढील कार्यवाहीस्तव नमूद मुद्देमाल व आरोपींना पोलीस शिवाजीनगर यांचे ताब्यात देण्यात आले असून पोलीस पुढील तपास करीत आहेत. सदरची कामगिरी वरिष्ठांचे मार्गदर्शनात स्थानिक गुन्हे शाखेचे पोलीस निरीक्षक संजीवन मिरकले यांचे मार्गदर्शनात पोलीस अंमलदार माधव बिल्लापट्टे, नवनाथ हासबे, तुराब पठाण, संजय कांबळे, राजेश कंचे, पुढेवाड, नकुल पाटील, सिद्धेश्वर जाधव, सुधीर कोळसुरे,सोनकांबळे, युवराज गिरी, मोहनसुरवसे यांनी पार पाडली.
