नांदेड : प्रतिनिधी
एका धक्कादायक घटनेने नांदेड हादरले आहे. पित्याने आपल्या पोटच्या विवाहित मुलीची आणि तिच्या प्रियकराची हत्या करून मृतदेह विहरीत फेकले. धक्कादायक म्हणजे हत्या करून आरोपी पिता स्वत:हून पोलिस ठाण्यात हजर होऊन घटनेची माहिती दिली. जिल्ह्यातील उमरी तालुक्यातील गोळेगाव येथे ही धक्कादायक घटना घडली आहे. पोलिसांनी गावक-यांच्या मदतीने मुलीचा मृतदेह विहरीतून बाहेर काढले, तर मुलाचा शोध सुरुच होता. संजीवणी कमळे (वय १९ वर्ष) आणि लखन बालाजी भंडारे (वय १९) अशी मयतांची नावे आहेत. दरम्यान या घटनेने खळबळ उडाली आहे.
मयत संजीवनी सुरने ही उमरी तालुक्यातील बोरजुन्नी येथील रहिवासी आहे. एक वर्षापूर्वी गोळेगाव येथील सुधाकर कमळे या मुलासोबत संजीवनीचा विवाह झाला होता. विवाहापूर्वी संजीवनीचे लखन भंडारे या तरुणासोबत प्रेम प्रकरण सुरु होते. लग्नानंतर ही दोघांमध्ये फोनवर बोलणे सुरुच होते. सोमवारी संजीवनीच्या सासरचे मंडळी बाहेर गेल्याने संजीवनी हिने आपल्या प्रियकराला घरी बोलवले. अचानक घरी परतलेल्या पती आणि सासरच्या मंडळींनी संजीवनी आणि तिच्या प्रियकराला नको त्या अवस्थेत बघितले. त्यानंतर संजीवनीच्या पतीने सास-यांना फोन करून मुलीला घरी घेऊन जाण्यास सांगितले.
मुलीचे वडील मारोती सुरणे, काका माधव सुरणे आणि आजोबा लक्ष्मण सुरणे हे तिघे जण मुलीच्या सासरी गोळेगावला पोहचले. आरोपींनी मुलीला आणि तिच्या प्रियकराला घेऊन जात असताना करकाळा शिवारात दोघांना मारहाण करून त्यांची हत्या केली, त्यानंतर चाळीस फूट खोल असलेल्या विहरीत दोघांचे मृतदेह फेकून दिले. घटनेनंतर सायंकाळी ५ वाजण्याच्या सुमारास मुलीचे वडिल मारोती सुरणे हे उमरी पोलिस ठाण्यात पोहचून मुलीसह तिच्या प्रियकराचा खून केल्याची माहिती दिली. यानंतर पोलिसांनी आजोबा, वडील, काका तिघांना ताब्यात घेतले.
दरम्यान पोलिस आरोपीला घेऊन घटनास्थळी पोहचले. सायंकाळी सात वाजता मुलीचे प्रेत बाहेर काढण्यात आले तर मुलगाच्या प्रेताचा शोध सुरूच आहे. दरम्यान सदर घटनेची माहिती मिळताच अप्पर पोलिस आधिक्षक अर्चना पाटील, उपविभागीय पोलिस आधिकारी दशरथ पाटील यांनी घटनास्थळी भेट दिली. यावेळी उमरी पो स्टे चे सहाय्यक पोलिस निरीक्षक अंकुश माने यांनी घटनास्थळीचा पंचनामा केला.
