औसा : प्रतिनिधी
राष्ट्रवादी काँग्रेस शरदचंद्र पवार पक्ष औसा तालुक्याच्या वतीने (दि. २४ सप्टेंबर २०२६) गुरुवार रोजी सकाळी ११.४५ वाजता औसा टि-पॉईन्ट चौकात सुमारे पाऊण तास रास्ता रोको आंदोलन करीत सरकारच्या विरोधात जोरदार घोषणाबाजी करण्यात आली. हे आंदोलन राष्ट्रवादी युवक काँग्रेस शरद पवार पक्षाचे प्रदेशाध्यक्ष महेबूब शेख यांच्या नेतृत्वाखाली करण्यात आले.
औशावर दुष्काळाचे संकट आले आहे. सरकार मात्र गाढ झोपेत आहे आता आपण शेतक-यांसाठी गप्प बसणार नाही. दुष्काळ जाहीर करा आणि शेतकरी, शेतमजूर व विद्यार्थ्यांना तातडीने मदत द्या. औशातील शेतकरी संकटात आहे. शेतमजूर अडचणीत आहे आणि विद्यार्थ्यांवर शिक्षणाचा आर्थिक भार वाढत आहे. औसा तालुका तात्काळ दुष्काळग्रस्त जाहीर करा. शेतक-यांना हेक्टरी ५० हजार रुपये अनुदान तातडीने द्या, शेतमजुरांना प्रति हेक्टरी २५ हजार रुपये मदत द्या, जनावरांसाठी चारा डेपो तात्काळ सुरू करा, विद्यार्थ्यांची शैक्षणिक शूल्क माफ करा, विद्यार्थ्यांच्या हॉस्टेलसाठी अनुदान द्या, विद्यार्थ्यांच्या मेससाठी अनुदान देण्यात यावे आदी मागण्यासाठी हे आंदोलन करण्यात आले. सरकारने परिस्थितीचे गांभीर्य ओळखून तातडीने ठोस निर्णय घ्यावेत. आश्वासनांपेक्षा प्रत्यक्ष मदत हवी आहे.
औसा तालुक्यात गेल्या दोन महिन्यांपासून पावसाने मोठी दडी मारल्याने खरीप पिकांचे मोठ्या प्रमाणात नुकसान झाले आहे. सोयाबीन उघडून गेले असून शेतक-यांना मोठ्या आर्थिक संकटाला सामोरे जावे लागत आहे. त्यामुळे औसा तालुक्यात तातडीने दुष्काळ जाहीर करून शेतक-यांना सरसकट मदत द्यावी, अशी मागणी राष्ट्रवादी काँग्रेस पक्ष शरदचंद्र पवार गटाचे युवक प्रदेशाध्यक्ष महेबुब शेख यांच्या नेतृत्वाखाली व औसा तालुकाध्यक्ष नरेंद्र राजेंद्र पाटील यांनी आंदोलन करत राज्याचे मुख्यमंत्री देवेंद्र फडणवीस यांच्याकडे निवेदनाद्वारे दुष्काळ जाहीर करण्याची मागणी केली आहे. या आंदोलनात युवक मराठवाडा विभागाध्यक्ष प्रशांत घार, पक्षाचे माजी प्रवक्ते शिवराज बांगर, युवक प्रदेश सरचिटणीस रामेश्वर पवार, प्रशांत घोलप, उमेश गायकवाड यांच्यासह पक्षाचे पदाधिकारी, शेतकरी व कार्यकर्ते उपस्थित होते.
