किन्होळा पाटीजवळ ट्रक-स्कॉर्पिओची समोरासमोर धडक; पाच जण जखमी

परभणी : परभणी ते पाथरी मार्गावरील किन्होळा पाटीजवळ शुक्रवार, दि. ७ आॅगस्ट रोजी रात्री साडेआठच्या सुमारास ट्रक आणि महिंद्रा स्कॉर्पिओची समोरासमोर धडक झाली. या अपघातात स्कॉर्पिओमधील पाच जण जखमी झाले असून, त्यापैकी अक्रम कुरेशी आणि मैफूस सय्यद हे गंभीर जखमी झाले होते. मात्र, त्यांची प्रकृती आता स्थिर असल्याची माहिती मिळाली आहे.
अपघातात महिंद्रा स्कॉर्पिओचे मोठ्या प्रमाणात नुकसान झाले आहे. सर्व जखमींवर परभणी येथील रूग्णालयात उपचार सुरू आहेत. पोलिसांनी दिलेल्या माहितीनुसार, टाटा ट्रक (एमएच ३८ एक्स ५३६९) पाथरीहून परभणीकडे येत होता. किन्होळा पाटीजवळ रस्त्यावरील खड्ड्यात ट्रकचे टायर गेल्याने वाहनाचा तोल बिघडला. त्यातच स्टेअरिंग रॉड तुटल्याने चालकाचे वाहनावरील नियंत्रण सुटले आणि समोरून येणाºया महिंद्रा स्कॉर्पिओ (एमएच २३ बीएच ५७४७) ला जोरदार धडक बसली.
या अपघातात वसीम कुरेशी, अक्रम कुरेशी, मेहबूब बंसुरी, मैफूस सय्यद आणि अदनान शहा, सर्व रा. मानवत, हे जखमी झाले. ट्रक चालक त्रिंबक वैजनाथ झाडे (वय ३५, रा. टोम पिंपळगाव, ता. जि. परभणी) यांना दुखापत झाली नसल्याचे पोलिसांनी सांगितले.
अपघाताची माहिती मिळताच मानवत पोलीस आणि महामार्ग पोलिसांनी घटनास्थळी धाव घेतली. दोन्ही वाहने रस्त्याच्या बाजूला करून वाहतूक सुरळीत करण्यात आली. या अपघाताचा पुढील तपास मानवत पोलीस करीत आहेत.