लातूर : प्रतिनिधी
लातूर जिल्ह्यातील दुष्काळी परिस्थिती दिवसेंदिवस अत्यंत गंभीर बनत चालली असून पावसाअभावी खरीप पिके करपून पूर्णपणे वाया गेली आहेत. या भीषण संकटाच्या पार्श्वभूमीवर, राज्याचे माजी मंत्री, आमदार अमित विलासराव देशमुख यांच्या सूचनेनुसार लातूरचे खासदार डॉ. शिवाजी काळगे आणि लातूर जिल्हा काँग्रेस कमिटीचे अध्यक्ष अभय साळुंके यांनी देवणी तालुक्यातील लासोना येथे थेट शेतक-यांच्या बांधावर जाऊन वाळलेल्या सोयाबीन पिकांची पाहणी केली. यावेळी दोन्ही नेत्यांनी संकटात सापडलेल्या शेतक-यांशी संवाद साधून त्यांच्या समस्या जाणून घेतल्या आणि शेतक-यांना धीर दिला.
पाहणीदरम्यान स्थानिक शेतकरी शिवाजी भोरे यांच्या शेतातील सोयाबीनच्या नुकसानीची प्रत्यक्ष पाहणी करण्यात आली. पेरणीनंतर तब्बल ५० ते ५५ दिवसांपेक्षा अधिक काळ पावसाचा खंड पडल्याने पिकांची वाढ खुंटली असून सोयाबीनच्या शेंगांमध्ये दाणे भरलेले नाहीत, झाडे पार करपून गेली आहेत. प्रति एकर सुमारे ३५ हजार रुपये खर्च करूनही हातात काहीच पडणार नाही अशी विदारक स्थिती निर्माण झाली असल्याचे शेतक-यांनी सांगितले. त्यातच मागील नुकसानीची मदत आणि विमा भरपाई अद्याप मिळाली नसताना आता नव्याने ओढवलेल्या दुष्काळामुळे शेतकरी आणि शेतमजूर आर्थिकदृष्ट्या पूर्णपणे उद्ध्वस्त झाला आहे, असा संतापही शेतक-यांनी व्यक्त केला.
यावेळी बोलताना खासदार डॉ. शिवाजी काळगे म्हणाले की, दोन दिवसांपूर्वीच दिशा समितीच्या बैठकीत संपूर्ण जिल्ह्यात गंभीर दुष्काळी परिस्थिती असल्याबाबत ठराव मंजूर करून शासनाकडे पाठवण्यात आला आहे. तसेच केंद्रीय कृषि मंत्र्यांची भेट घेऊन दुष्काळासंदर्भात केंद्राकडे पाठपुरावा केला जाणार असून राज्य सरकारने कोणतीही चालढकल न करता तात्काळ लातूर जिल्ह्यात दुष्काळ जाहीर करावा आणि शेतक-यांच्या खात्यावर थेट मदत जमा करावी, अशी आग्रही मागणी त्यांनी केली.
जिल्हा काँग्रेस कमिटीचे अध्यक्ष अभय साळुंके यांनी सरकारवर टीका करताना सांगितले की, आता कितीही पाऊस पडला तरी सोयाबीन पिकाची रास होणे शक्य नसून पिकांचे १०० टक्के नुकसान झाले आहे. शेजारच्या कर्नाटक सरकारने परिस्थितीचे गांभीर्य ओळखून तात्काळ दुष्काळ जाहीर केला असताना, महाराष्ट्रातील सरकार केवळ तारखा सांगून वेळकाढूपणा करत आहे. शेतक-यांच्या जीवन-मरणाचा प्रश्न निर्माण झाला असून जनावरांच्या चा-याचा आणि पाण्याचा प्रश्नही बिकट बनत आहे. शेतक-यांना व मजुरांना तात्काळ ठोस आर्थिक मदत न मिळाल्यास काँग्रेस पक्षाच्या वतीने जिल्ह्यातील सर्व १० तालुक्यांमध्ये तहसील कार्यालयांवर धडक मोर्चे काढले जातील, असा इशाराही त्यांनी दिला. या दुष्काळ पाहणी दौ-याप्रसंगी काँग्रेस पक्षाचे स्थानिक पदाधिकारी, विविध संस्थांचे सभापती, लोकप्रतिनिधी तसेच शेतकरी उपस्थित होते.
