चाकूर : प्रतिनिधी
तालूक्यातील वडवळ ना. येथे पाण्याच्या टँकरमध्ये शिल्लक पाणी पाहायला एक युवक गेला असता विद्युत तारेचा स्पर्श होऊन येथील युवकाचा मृत्यू झाल्याची दुर्दैवी घटना मंगळवारी (दि.१६) रोजी सकाळी घडली. वडवळ नागनाथ येथे तीव्र पाणीटंचाई जाणवत असल्याने विविध वार्डामध्ये पाणी वाटपासाठी ग्रामपंचायतीच्या वतीने पाण्याचे टँकरने पाणीपुरवठा केला जात आहे.
मंगळवारी सकाळी येथील बौद्ध वस्तीत पाण्याच्या टँकरने पाणी वाटप करीत असताना येथील युवक श्रावण बालाजी मस्के (वय वर्षे – २७) हा टँकरमध्ये शिल्लक असलेले पाणी पाहण्यासाठी टँकरवर चढला असता महावितरणच्या विद्युत तारेचा स्पर्श झाल्याने शॉक लागून युवक गंभीर जखमी झाला. त्यास लातूर येथील शासकीय रुग्णालयात उपचारासाठी नेत असताना युवकाचा मृत्यू झाल्याची दुर्दैवी घटना घडली. या प्रकरणी पोलिस ठाण्यात अकस्मात मृत्यूची नोंद करण्यात आली आहे. यामुळे वडवळ नागनाथ गावावर शोककळा पसरली आहे. दरम्यान, श्रावणची उत्तरिय तपासणी केल्यानंतर मंगळवारी सायंकाळी त्यांच्यावर अंत्यसंस्कार करण्यात आले. त्याच्या पश्चात आई -वडील, भाऊ, बहिण असा परिवार आहे.
