पुणे : प्रतिनिधी :
पुण्यश्लोक अहिल्यादेवी होळकर कर्जमुक्ती योजनेतील गावपातळीवर प्रसिध्द झालेल्या याद्यांमध्ये व्यापारी बँकांमधील एनपीए खातेदार शेतक-यांच्या नावासमोर दर्शविलेल्या थकबाकी रक्कम तसेच योजनेच्या पोर्टलवरील रकमेत फरक असल्याचे निदर्शनास आले आहे. गाव पातळीवर प्रसिद्ध केलेली यादी व योजनेच्या पोर्टलवरील शेतक-यांच्या थकबाकी रकमेत फरक असल्यास योजना पोर्टलवरील थकबाकीची रक्कम ग्राहय धरावी, असे राज्याचे सहकार आयुक्त आणि निबंधक (सहकारी संस्था) दीपक तावरे यांनी सांगितले.
योजनेच्या पोर्टलवर दिसणारी शेतक-यांच्या कर्जाची थकबाकीची रक्कम ३१.३.२०२६ रोजीची आहे. शासनाने १.७.२०२६ रोजीच्या पत्रान्वये सर्व बँकांना १.४.२०२६ नंतरच्या व्याजाची रक्कम न आकारण्याच्या सूचना दिलेल्या आहेत व सर्व बँकांनी त्या मान्य असल्याचे लेखी कळविले आहे. शेतक-यास योजनेच्या पोर्टलवर दिसणारी रक्कम मान्य असल्यास त्यांनी आधार प्रमाणीकरण करावे. आधार प्रमाणीकरण केल्यानंतर शेतक-यास आधार प्रमाणीकरण यशस्वी झाल्याची पावती प्राप्त होणार आहे. या पावतीमध्ये शेतक-याची कर्जमुक्ती होणा-या रकमेची माहिती उपलब्ध आहे.
आधार प्रमाणीकरण केल्यानंतर शेतक-यांचे दिनांक ३१.०३.२०२६ वरील कर्जबाकीच्या लाभाची रक्कम त्यांच्या कर्जखात्यात डीबीटीद्वारे जमा केली जाणार आहे. उपरोक्त कर्जमुक्तीनंतर शेतक-यास कर्ज बेबाकी प्रमाणपत्र देण्यात येणार आहे. कर्जमुक्ती झाल्यानंतर सर्व कर्जमुक्ती शेतक-यांच्या याद्या संबंधित बँकेच्या शाखेत व विविध कार्यकारी सेवा संस्थांमध्ये लावण्यात येतील. कर्जमुक्तीचा लाभ मिळालेल्या सर्व शेतक-यांना संबंधित बँकेमार्फत खरीप पीक कर्जाची उपलब्धता होणार आहे.
योजनेच्या पोर्टलवरील रक्कम किंवा पोर्टलवरील शेतक-यांच्या कर्जाबाबत इतर कोणताही तपशील शेतक-यास अमान्य असल्यास त्याने पोर्टलवर तक्रारीची नोंद करावी. या तक्रारीचे निराकरण जिल्हाधिकारी यांच्या अध्यक्षतेखालील जिल्हास्तरीय समितीमार्फत केले जाईल.
कर्जखात्यांची यादी आधार प्रमाणीकरणासाठी प्रसिद्ध
कर्जमाफी व एकवेळ समझोता घटकाकरिता योजनेच्या पोर्टलवर बँकांनी एकूण ३१.१७ लाख कर्जखात्यांची माहिती अपलोड केली आहे. बँकेमार्फत सादर केलेल्या कर्जखात्यांचे महा-आयटी मार्फत योजना निकषानुसार संगणकीय संस्करण करून २५ जुलै २०२६ रोजी एकूण १६.९६ लाख कर्जखात्यांची यादी आधार प्रमाणीकरणासाठी प्रसिद्ध करण्यात आली आहे. जिल्हा मध्यवर्ती सहकारी बँकेकडील ७.०३ लाख कर्जखाती व व्यापारी बँकांकडील ९.९३ लाख कर्जखात्यांचा समावेश आहे.
