नांदेड : प्रतिनिधी
जिल्ह्यातील वीजपुरवठ्याच्या विविध प्रश्नांवर तातडीने उपाययोजना करण्यासाठी शनिवारी जिल्हाधिकारी कार्यालयात महावितरणच्या अधिका-यांची लोकप्रतिनिधींच्या उपस्थितीत महत्त्वपूर्ण बैठक झाली. या बैठकीला जिल्ह्यातील ४ खासदार व ५ आमदार उपस्थित होते. जिल्ह्यातील वीज समस्या, वाढती विजेची मागणी, अपुरा पायाभूत वीजपुरवठा, शेतीपंपांचा वीजपुरवठा, ट्रान्सफॉर्मर तसेच प्रलंबित तक्रारींवर बैठकीत सविस्तर चर्चा करण्यात आली.
जिल्ह्यातील शहरी तसेच ग्रामीण भागात गेल्या दोन-तीन वर्षांपासून वीजपुरवठ्याबाबत नागरिक व शेतक-यांना मोठ्या अडचणींचा सामना करावा लागत आहे. वारंवार वीज खंडित होणे, तक्रारींचे वेळेत निराकरण न होणे, ट्रान्सफॉर्मरच्या समस्या तसेच शेतीपंपांना सुरळीत वीज न मिळणे, अशा विविध प्रश्नांमुळे नागरिकांमध्ये नाराजी आहे. या पार्श्वभूमीवर ही बैठक घेण्यात आली.
बैठकीनंतर माजी मुख्यमंत्री तथा खा. अशोक चव्हाण यांनी सांगितले की, जिल्ह्यातील वीज प्रश्न सोडविण्यासाठी ही बैठक घेण्यात आली. वीजपुरवठ्यात सुधारणा करण्याची गरज असून महावितरणसंदभार्तील अनेक तक्रारी आहेत. या तक्रारींच्या निवारणासोबतच राज्य शासनाच्या महावितरणशी संबंधित योजनांवरही चर्चा करण्यात आली. काही प्रश्नांवर धोरणात्मक निर्णय घेण्याची आवश्यकता आहे. बैठकीचा अहवाल शासनाकडे पाठविण्यात येणार असून स्थानिक प्रश्न स्थानिक पातळीवर, तर राज्य व केंद्र शासनाशी संबंधित प्रश्न वरिष्ठ पातळीवर सोडविण्यात येतील. येत्या आठ-दहा दिवसांत पुन्हा बैठक घेण्यात येणार असल्याचे त्यांनी सांगितले.
जिल्ह्यात वीजेचा प्रश्न गंभीर का झाला आहे, याबाबत बोलताना खा. चव्हाण यांनी जिल्ह्यात विजेची मागणी वाढली असून त्या तुलनेत वीज वितरणाचे पायाभूत इन्फ्रास्ट्रक्चर कमी पडत असल्याचे दिसून येत आहे. हा प्रश्न मार्गी लावण्यासाठीच बैठक घेण्यात आल्याचे स्पष्ट केले.या बैठकीस महावितरण जिल्हा विद्युत समितीचे अध्यक्ष खा. अशोक चव्हाण, सहअध्यक्ष खा. डॉ. अजित गोपछडे, खा. नागेश पाटील आष्टीकर, खा. रवींद्र चव्हाण, आ. बालाजी कल्याणकर, आ. आनंदराव बोंढारकर, आ. श्रीजयाताई चव्हाण, आ. जितेंद्र अंतापूरकर, आ. प्रताप पाटील चिखलीकर, जिल्हाधिकारी राहुल कर्डिले, अधीक्षक अभियंता संजय खंदारे, निवासी उपजिल्हाधिकारी किरण अंबेकर, राष्ट्रवादी काँग्रेसचे प्रदेश सरचिटणीस वसंत सुगावे, गोविंदराव शिंदे नागेलीकर आदी उपस्थित होते.
नागरिक, शेतक-यांच्या अडचणी तातडीने सोडवा
खा. प्रा. रवींद्र चव्हाण यांनी वीजपुरवठा हा सर्वसामान्यांच्या दैनंदिन जीवनाचा आणि विकासाचा मुख्य आधार असल्याचे सांगितले. महावितरणची सेवा ही जनतेची सेवा असल्याने नागरिक व शेतक-यांच्या अडचणींवर तातडीने उपाययोजना करण्याच्या स्पष्ट सूचना अधिका-यांना देण्यात आल्याचे त्यांनी सांगितले.
वीज खंडित होण्याच्या प्रश्नावर गांभीयार्ने लक्ष
नांदेड उत्तरचे आ. बालाजी कल्याणकर यांनी जिल्ह्यातील वीजपुरवठ्याचा आढावा घेऊन नागरिक, शेतकरी व वीजग्राहकांच्या विविध समस्यांवर तातडीने उपाययोजना करण्यासाठी बैठक झाल्याचे स्पष्ट केले. वीजपुरवठा सुरळीत व अखंडित असणे ही नागरिकांची मूलभूत गरज आहे. त्यामुळे वीज खंडित होणे, प्रलंबित तक्रारी, शेतीपंपांचा वीजपुरवठा आणि स्थानिक पातळीवरील विविध अडचणी याकडे गांभीयार्ने लक्ष देऊन वेळेत कार्यवाही करण्याच्या सूचना संबंधित अधिका-यांना देण्यात आल्याचे त्यांनी सांगितले.
प्रलंबित वीज जोडण्या, ट्रान्सफॉर्मरच्या समस्यांवर चर्चा
आ. प्रतापराव पाटील चिखलीकर यांनी मतदारसंघातील विविध वीजविषयक अडचणी व समस्यांवर महावितरणच्या वरिष्ठ अधिका-यांसोबत सविस्तर चर्चा झाल्याचे सांगितले. प्रलंबित वीज जोडण्या, ट्रान्सफॉर्मरच्या समस्या, सुरळीत वीजपुरवठा तसेच नागरिकांच्या इतर तक्रारींबाबत सकारात्मक चर्चा झाली असून, लवकरात लवकर योग्य ती उपाययोजना करण्याचे निर्देश संबंधित अधिका-यांना देण्यात आल्याचे त्यांनी स्पष्ट केले.आता या बैठकीनंतर जिल्ह्यातील वीज प्रश्न कितपत मार्गी लागतात आणि येत्या आठ-दहा दिवसांत होणा-या पुढील बैठकीत कोणते ठोस निर्णय घेतले जातात, याकडे जिल्ह्यातील नागरिकांचे लक्ष लागले आहे.
