रेणापूर: सिद्धार्थ चव्हाण
तालुक्यातील दुष्काळी परिस्थिती लक्षात घेता दिवाळीपूर्वी शेतक-यांच्या बँक खात्यावर पाच हजार रुपयांची अग्रिम मदत जमा करण्यात येईल, असे आश्वासन शासनाकडून देण्यात आले होते. ५२ हजार १६७ शेतक-यांच्या बँक खात्यावर पाच हजार रुपयांची अग्रिम मदत जमा झाली. त्यामुळे शासनाने दिलेल्या ९५ टक्के आश्वासनाची जवळपास १०० टक्के पूर्तता झाल्याचे चित्र आहे.
तालुक्यातील सुमारे ५४ हजार शेतकरी असून ५२ हजार १६७ शेतक-याच्या खात्यावर मदतीची रक्कम जमा झाली म्हणजे शेतक-यांच्या हातात पैसे आले, असे नाही. बँकांमधून ही रक्कम काढताना अनेक शेतक-यांना अडचणींचा सामना करावा लागत आहे. एकाच वेळी बँकांतील गर्दी, तांत्रिक अडचणी, पैसे काढण्याच्या प्रक्रियेतील विलंब अशा कारणांमुळे ऐन दिवाळीत शेतक-यांची गैरसोय झाली. खरीप हंगाम पावसाअभावी वाया गेल्याने शेतकरी आधीच आर्थिक संकटात आहे. अशा परिस्थितीत पाच हजार रुपयांची अग्रिम मदत ही मोठा दिलासा ठरेल, अशी अपेक्षा होती. मात्र, ही रक्कम प्रत्यक्ष हातात मिळवण्यासाठीच शेतक-यांना कसरत करावी लागल्याने सणातच तासनतास बॅकेत रांगेत थांबावे लागल्याने मोठी आडचण निर्माण झाली.
