गोंगशू : वृत्तसंस्था
भारतीय महिला हॉकी संघाने आशिया कप २०२५ स्पर्धेतील सलामीच्या लढतीत दिमाखदार विजय नोंदवला. चीनमधील हांगझोऊच्या गोंगशू जिल्ह्यातील कॅनॉल स्पोर्ट्स पार्क स्टेडियमवर ‘ब’ गटातील भारत विरुद्ध थायलंड यांच्यातील सामना खेळवण्यात आला. भारतीय महिला हॉकी संघाने ११-० असा धुव्वा उडवत स्पर्धेत विजयी सलामी दिली. भारतीय महिला हॉकी संघ या प्रतिष्ठित स्पर्धेत दिग्गज गोल कीपर सविता पुनिया आणि ड्रॅग फ्लिकर दीपिका शिवाय मैदानात उतरला. दोघीही दुखापतीमुळे या स्पर्धेला मुकल्या. मात्र त्यांच्या अनुपस्थितीत भारतीय महिला संघाने मिळवलेला विजय आणखी मोठा आणि महत्त्वपूर्ण ठरतो.
यंदाच्या हंगामातील महिला आशिया कप स्पर्धेत ८ संघ सहभागी असून दोन गटात संघांची विभागणी करण्यात आली. प्रत्येक गटातून अव्वल दोन संघ सुपर ४ साठी पात्र ठरणार आहेत. यातील दोन अव्वल संघ १४ सप्टेंबरला फायनल खेळतील.
भारतीय महिला हॉकी संघाकडून उदिता दुहान आणि ब्यूटी डुंग डुंग या दोघींनी प्रत्येकी २-२ गोल डागले. उदिताने ३० व्या आणि ५२ व्या मिनिटांत पेनल्टीचे गोलमध्ये रुपांतरित केले. डुंग डुंग हिने ४५ व्या आणि ५४ व्या मिनिटात संघासाठी दोन गोल डागले. मुमताज खान हिने संघाला ७ व्या मिनिटाला खाते उघडून दिले. अवघ्या काही वेळातच संगीता कुमारी हिने १० व्या मिनिटाला गोल डागत ही आघाडी २-० अशी केली. १६ व्या मिनिटाला नवनीत कौर आणि १८ व्या मिनिटाला लालरेम्सियामी हिने गोल डागल्याचे पाहायला मिळाले. थौदाम सुमन देवी, शर्मिला देवी आणि रुताजा पिसल यांनीही प्रत्येकी १-१ गोल डागत संघाला मोठा विजय मिळवून देण्यात पुढाकार घेतला.
