कोलकाता : पश्चिम बंगालच्या उत्तर २४ परगणा जिल्ह्यात २० वर्षीय महिलेवर तिच्या पतीसमोर सामूहिक बलात्कार करण्यात आला. ही घटना मंगळवारी रात्री कल्याणी-बैरकपूर एक्स्प्रेसवेवर घडली. पोलिसांनी या प्रकरणी आठ आरोपींना अटक केली आहे. सर्व आरोपी कांचरापाडा येथील रहिवासी आहेत.
पोलिसांकडून मिळालेल्या माहितीनुसार, मंगळवारी रात्री महिला आपल्या पतीसोबत कल्याणी-बैरकपूर एक्स्प्रेसवेवरून जात होती. घटनास्थळाजवळ रस्त्याच्या कडेला अनेक गुंड बसून दारू पीत होते. या लोकांनी महिलेला आणि तिच्या पतीला घेरले.
गुंडांनी महिलेला गाडीतून बाहेर ओढले. तिच्या पतीला बंधक बनवले. गुंड महिलेवर जबरदस्ती करू लागले तेव्हा पतीने तिला वाचवण्याचा प्रयत्न केला. गुंडांनी त्याच्याशी मारामारी केली. सामूहिक बलात्कार होत असताना महिलेच्या ओरडण्याचा आवाज ऐकून आजूबाजूचे लोक धावत आले. लोक येताना पाहून गुंड पळून गेले.
बुधवारी सकाळी महिलेने कल्याणी पोलिस ठाण्यात तक्रार दाखल केली. त्यानंतर पोलिसांनी या प्रकरणाचा तपास सुरू केला. सुरुवातीला पोलिसांनी चार जणांना अटक केली. त्यांच्याकडून मिळालेल्या माहितीच्या आधारे आणखी चार आरोपींना अटक करण्यात आली. पोलिसांनी आठही आरोपींना न्यायालयात हजर केले. न्यायालयाने सर्वांना पोलिस कोठडी सुनावली आहे. त्यांची चौकशी सुरू आहे.
एका पोलिस अधिका-याने सांगितले की, प्रकरणाचा सखोल तपास सुरू आहे. पुरावे गोळा करण्यासाठी फॉरेन्सिक तज्ज्ञांच्या एका टीमला घटनास्थळी पाठवण्यात आले होते. पुराव्यांच्या आधारे पुढील कारवाई केली जात आहे. तपास सुरू आहे. महिलेचा जबाब नोंदवण्यात आला आहे. तिच्या पतीकडूनही घटनेची माहिती घेण्यात आली आहे. घटनास्थळाजवळील परिसरातील लोकांकडूनही चौकशी करण्यात आली आहे.
