मराठवाडा विभागाच्या आढावा बैठकीत ठराव, प्रदेशाध्यक्षांना पत्र
छ. संभाजीनगर : प्रतिनिधी
मराठवाड्याच्या विकासासाठी अनमोल योगदान दिलेले जलक्रांतीचे जनक स्वर्गीय शंकरराव चव्हाण आणि माजी मुख्यमंत्री विलासराव देशमुख यांचे मराठवाड्याच्या राजधानीत भव्य स्मारक व्हावे, या मागणीसाठी काँग्रेस नेते व कार्यकर्त्यांनी महाराष्ट्र प्रदेश काँग्रेस कमिटीचे प्रदेशाध्यक्ष हर्षवर्धन सपकाळ यांच्याकडे ठराव घेण्यासंबंधीचे पत्र दिले. त्यानुसार प्रदेशाध्यक्षांनी या दोन्ही नेत्यांचे स्मारक उभारण्याच्या ठरावास मराठवाडा विभागाच्या आढावा बैठकीत मंगळवारी मान्यता दिली.
डॉ. रेखाताई चव्हाण, अ‍ॅड. सुरेंद्र घोडजकर, प्रकाश भगनुरे पाटील, संजय वाघमारे, दीपकसिंग हुजुरिया, प्रवीण केदार, शांतीलाल पवार, प्रमोद सोनवणे यांनी स्मारक उभारण्यासाठी प्रदेशाध्यक्षांकडे पत्र देऊन ठराव घेण्यासंबंधी विनंती केली. त्यास प्रदेशाध्यक्षांनी होकार दिला. शंकरराव चव्हाण यांना आपल्यातून जाऊन २२ वर्षे झाली आहेत तर विलासराव देशमुख यांचे अकाली निधन होऊन १४ वर्षे झाली आहेत. या दोन्ही नेत्यांनी मराठवाड्याच्या व महाराष्ट्राच्या विकासात योगदान दिले आहे. छत्रपती संभाजीनगर येथे मराठवाड्याच्या राजधानीत या दोन्ही नेत्यांचे भव्य स्मारक व्हावे, अशी मराठवाड्यातील नेते व कार्यकर्त्यांची इच्छा आहे. या स्मारकाच्या माध्यमातून या नेत्यांचे कार्य भावी पिढीला प्रेरणा देईल. त्यामुळे शंकरराव चव्हाण यांच्या १०६ व्या जयंतीचे औचित्य साधून स्मारक उभारण्याविषयीची मागणी करण्यात आली.
छत्रपती संभाजीनगरातील दूध डेअरीच्या परिसरात स्वर्गीय गोपीनाथराव मुंडे यांच्या स्मारकाचे काम सुरू आहे. त्यांच्या शेजारीच शंकरराव चव्हाण आणि विलासराव देशमुख यांचे स्मारक व्हावे, अशी कार्यकर्त्यांची इच्छा आहे. कडक शिस्तीचे भोक्ते असलेल्या शंकरराव चव्हाण यांनी महाराष्ट्राचे चौथे मुख्यमंत्री, केंद्र सरकारमध्ये गृहमंत्री, अर्थमंत्री, नियोजन आयोगाचे अध्यक्षपद, अशी पदे भूषविली आहेत. विकासरत्न विलासराव देशमुख यांचा ग्रामपंचायतच्या राजकारणापासून थेट केंद्रीय मंत्र्यांपर्यंत प्रवास राहिलेला आहे. त्यांनी दोन वेळा महाराष्ट्राचे मुख्यमंत्रीपद, केंद्रात मंत्रीपद आणि महाराष्ट्रात विविध खात्यांचे मंत्री म्हणून काम केले आहे. त्यामुळे त्यांचे मराठवाड्याच्या राजधानीत स्मारक व्हावे, म्हणून काँग्रेसचे नेते व कार्यकर्त्यांनी आग्रह धरला आहे.
