छत्रपती संभाजीनगर : प्रतिनिधी
महापालिका निवडणुकीपूर्वी आणि निवडणुकीनंतर भांडणा-या आणि स्वबळावर ५७ नगरसेवक निवडून आल्यानंतर महापौर, उपमहापौरपदासह सर्वच पदांवर दावा सांगणा-या भाजपने अखेर बहुमतासाठी शिवसेनेला सोबत घेतले आहे. भाजपचा महापौर कोण यासाठी डझनभर इच्छुकांपैकी २ नावे भाजपाच्या प्रदेश समितीकडे पाठवण्यात आली होती. यात समीर राजूरकर आणि अनिल मकरी यांच्या नावाचा समावेश होता. आज प्रदेश समितीने महापौरपदासाठी समीर राजूरकर यांचे नाव निश्चित केले आहे. तर उपमहापौर पदावर शिवसेनेचे जिल्हाप्रमुख राजेंद्र जंजाळ यांची निवड करण्यात आली आहे.
छत्रपती संभाजीनगर महापालिकेत ३३ नगरसेवकांसह प्रमुख विरोधी पक्ष असलेल्या एमआयएम पक्षाला रोखण्यासाठी भाजप-शिवसेनेने समीर राजूरकर, राजेंद्र जंजाळ यांच्या रूपाने आक्रमक आणि तरुण चेहरे दिले आहेत. समीर राजूरकर हे भाजपचे अभ्यासू नगरसेवक म्हणून ओळखले जातात. समर्थनगर प्रभागातून ते निवडून आले आहेत.
प्रशासन आणि शासकीय योजना यांची इत्थंभूत माहिती आणि अभ्यास असणा-या समीर राजूरकर यांची महापौरपदी निवड करत भाजपने मोठी खेळी केली आहे. महापौरपदाच्या शर्यतीत अनेक नावे असताना समीर राजूरकर यांच्या नावाला पसंती देण्यात आली आहे. कोअर कमिटीतील सदस्य मंत्री अतुल सावे, खासदार भागवत कराड, आमदार संजय केनेकर, शहराध्यक्ष किशोर शितोळे, शिरीष बोराळकर, बसवराज मंगरुळे या सर्वांच्या सहमतीनंतर प्रदेश समितीने समीर राजूरकर यांच्या नावावर शिक्कामोर्तब केले.
