परभणी : भरधाव वेगाने जाणा-या इंधन टँकरने दुचाकीला पाठीमागून जोरदार धडक दिल्याने एका २५ वर्षीय तरुणाचा ठार झाला. ही दुर्दैवी घटना मंगळवार, दि. ९ जून रोजी सकाळी १०.३० वाजताच्या सुमारास परभणी-गंगाखेड महामार्गावरील सिंगणापूर फाट्याजवळ घडली. या घटनेनंतर टँकर चालक घटनास्थळावरून फरार झाला.
याबाबत माणिक आप्पाराव कदम यांनी फिर्याद दिली आहे. यात नमूद करण्यात आले आहे की, डिगांबर पिराजी कदम (वय २५) हे दुचाकी क्रमांक (एमएच १४ ईटी ६३३१) वरून सिंगणापूरकडे जात होते. ते तिरुपती पेट्रोल पंप परिसरात आले असता परभणीहून गंगाखेडकडे भरधाव वेगाने जाणा-या इंधन टँकरने क्रमांक (एमएच ४४ एजे ७४७७) दुचाकीला पाठीमागून जोरदार धडक दिली. या भीषण अपघातात डिगांबर कदम गंभीर जखमी झाल्याने घटनास्थळीच ठार झाले.
या प्रकरणी टँकर चालक लहुकुमार धोंडिबा पुरी याच्याविरुद्ध दैठणा पोलीस ठाण्यात गुन्हा दाखल करण्यात आला असून पुढील तपास पोलीस उपनिरीक्षक मुंढे करीत आहेत. या अपघाताची माहिती मिळताच सहाय्यक पोलीस निरीक्षक जी. जी. सोनेत, पोलीस अंमलदार विठ्ठल कुंडगीर व आशुतोष जाधव यांनी घटनास्थळी धाव घेत पंचनामा केला. यावेळी महामार्गावर गर्दी जमा झाल्याने वाहतूक ठप्प होऊन वाहनांच्या रस्त्याच्या दोन्ही बाजुने रांगा लागल्या होत्या.
