परभणी : दारूच्या नशेत असलेल्या मित्रांचा वाद होऊन या वादानंतर मित्रांनीच मित्राचा निर्घृण खून केल्याची धक्कादायक घटना बुधवार, दि. १० जून रोजी उघडकीस आली आहे. या घटनेनंतर गुन्हा लपविण्यासाठी युवकाचा मृतदेह टाकळी कुंभकर्ण येथील गायरान जमिनीत फेकून दिला असल्याची माहिती समोर आली आहे. खून झालेल्या युवकाचे नाव अशोक भगवान मोरे (वय ३५, रा. धर्मापुरी) असे असून या घटनेमुळे परिसरात खळबळ उडाली आहे.
याबाबत मिळालेल्या सविस्तर माहितीनुसार, अशोक मोरे हा आपल्या दोन मित्रांसोबत टाकळी कुंभकर्ण शिवारातील पोद्दार शाळेमागील भागात दारू पिण्यासाठी गेला होता. यावेळी दारूच्या नशेत त्यांच्यात वाद झाला. या वादाचे रूपांतर हाणामारीत होऊन मित्रांनी अशोकला काठी तसेच दगडाने बेदम मारहाण केली. या मारहाणीत अशोकचा जागीच मृत्यू झाला. त्यानंतर घाबरलेल्या आरोपींनी गुन्हा लपविण्याच्या उद्देशाने दुस-या दिवशी अशोकचा मृतदेह घटनास्थळावरून उचलून टाकळी कुंभकर्ण येथील गायरान जमिनीवरील गोरक्षण परिसरात आणून टाकल्याची माहिती उघड झाली आहे.
गायरान जमिनीवर मृतदेह आढळून आल्यानंतर परिसरात मोठी खळबळ उडाली होती. पोलिसांनी घटनास्थळी धाव घेत तपासाची चक्रे वेगाने फिरवत एका संशयित आरोपीला ताब्यात घेतले आहे. या प्रकरणातील इतर आरोपींचा शोध सुरू आहे. या खुनामागील नेमके कारण आणि संपूर्ण घटनाक्रम उघड करण्यासाठी पोलिसांकडून सखोल चौकशी सुरू आहे.
