म्हशीच्या गोठ्यावर धाड, कारवाईत बंदी घातलेले ६१२ ऑक्सिटोसिन इंजेक्शन जप्त
मुंबई : प्रतिनिधी
राज्यात अन्न व औषध प्रशासनाचे आयुक्त तुकाराम मुंढे यांच्या मार्गदर्शनाखाली अन्नातील भेसळ आणि बेकायदेशीर औषधांचा वापर करणा-यांविरोधात धडक मोहीम सुरू आहे. याच पार्श्वभूमीवर उल्हासनगरमध्ये एक मोठी कारवाई समोर आली. म्हशींचे दूध उत्पादन वाढविण्यासाठी बेकायदेशीरपणे दिली जाणारी आणि शासनाने बंदी घातलेली तब्बल ६१२ ऑक्सिटोसिन इंजेक्शन्स एफडीएच्या पथकाने जप्त केली.
उल्हासनगर कॅम्प क्रमांक ३ मधील ओटी सेक्शन, जसलोक हायस्कूल परिसरात असलेल्या प्रकाश वाधवानी याच्या म्हशीच्या गोठ्यावर एफडीएच्या पथकाने शनिवारी छापा टाकला. या छाप्यात जास्त दुधासाठी जनावरांना टोचली जाणारी ६१२ प्रतिबंधित इंजेक्शन्स आणि त्यासाठी वापरण्यात येणा-या प्लास्टिकच्या बाटल्यांचा मोठा साठा जप्त करण्यात आला.
ऑक्सिटोसिन या औषधाचा वापर जनावरांच्या आरोग्यासाठी अत्यंत घातक आणि क्रूर मानला जातो. या इंजेक्शन्समुळे जनावरांना प्रचंड त्रास होतो. इतकेच नाही तर अशा प्रकारे ऑक्सिटोसिन देऊन काढलेल्या दुधाचे सेवन केल्यास मानवी आरोग्यावर, विशेषत: लहान मुलांवर आणि गरोदर महिलांवर गंभीर दुष्परिणाम होण्याची भीती वैद्यकीय तज्ज्ञांनी व्यक्त केली आहे. याच कारणामुळे या औषधाच्या विक्रीवर आणि वापरावर शासनाने कायद्याने पूर्णपणे बंदी घातली आहे. असे असतानाही आघोरीपणाने पैसे कमावण्याच्या हव्यासातून बेकायदेशीरपणे अशा इंजेक्शनचा वापर करून दूध उत्पादन वाढविण्याचा प्रयत्न केला जातो. हे अत्यंत धक्कादायक असून, दूध विष तर बनले नाही ना, असा प्रश्न उपस्थित होऊ लागला आहे.
तबेला चालकावर
कठोर कारवाई
बेकायदेशीरपणे औषधांचा साठा बाळगल्या प्रकरणी आणि जनावरांच्या आरोग्याशी खेळ केल्या प्रकरणी आता गोठा चालकावर अन्न सुरक्षा आणि औषध प्रशासनाच्या कायद्यानुसार कडक कायदेशीर कारवाई करण्यात आली. एफडीएच्या या धडक कारवाईमुळे उल्हासनगर आणि ठाणे जिल्ह्यातील बेकायदेशीर दुग्ध व्यावसायिकांचे धाबे दणाणले आहेत.
