नांदेड : प्रतिनिधी
देगलूर पोलिसांनी २ वेगवेगळ्या ठिकाणी सुरू असलेल्या बेकायदेशीर तिर्रट जुगार अड्ड्यांवर कारवाई केली. या कारवाईत एकूण १९ आरोपींना ताब्यात घेण्यात आले असून, रोख रक्कम, मोबाईल, दुचाकी व जुगाराचे साहित्य असा एकूण १ लाख ५९ हजार २७० रुपयांचा मुद्देमाल जप्त करण्यात आला. ही कारवाई १९ सप्टेंबर रोजी करण्यात आली.
देगलूर पोलीस ठाण्याचे प्रभारी अधिकारी यांना मिळालेल्या गोपनीय माहितीनुसार खानापूर येथील सार्वजनिक ठिकाणी काही जण तिर्रट नावाचा जुगार खेळत असल्याचे समोर आले. पोलिसांनी कारवाई करत गजानन बाबुराव हेंटे , पांडुरंग लक्ष्मणराव डुडलवार , व्यंकट मानाजी हानटे , विठ्ठल लक्ष्मण डुडलवार , अनिल विठ्ठल गायकवाड, सदामैनोदीन पाशा, गजानन खुशोबा, विरभद्र काशीनाथ शिवाचार्य आणि शंकर हाणमंत लाळे ( सर्व रा. खानापूर, ता. देगलूर) यांच्याविरुद्ध कारवाई केली.या कारवाईत ३ मोबाईल (२० हजार रुपये), रोख २ हजार ६१० रुपये, १ दुचाकी ( ४० हजार रुपये) व जुगाराचे साहित्य, असा एकूण ६२ हजार ६१० रुपयांचा मुद्देमाल जप्त करण्यातआला.याप्रकरणी देगलूर पोलीस ठाण्यात गुन्हा दाखल करण्यात आला.
दुसरी कारवाई शिवबानगर, देगलूर येथील मोकळ्या जागेत करण्यात आली. येथेही तिर्रट जुगार सुरू असल्याची गोपनीय माहिती मिळाल्यानंतर पोलिसांनी छापा टाकला. या कारवाईत लक्ष्मण लालू बोगुलवार ( रा. दत्तनगर), सुरेश मारोती गवलवाड (रा. जयभीमनगर), स्वराज राजुकांबळे ( रा. भायेगाव रोड), राम भुमन्ना म्याकलवार ( रा. आनंदनगर), विजय पंढरी दौडे ( रा. सुभाषनगर), बजरंग माधव यरगलवार ( रा. गोकुळनगर), दिलीप गंगाधर गुगेवार ( रा. बंडागल्ली), अर्जुन शिवाजी चव्हाण ( रा. कलामंदिर तांडा), सुनील विठ्ठलराव सावित्रावार (रा.तुकारामनगर) आणि पिराजी म्हैसाजी पुठेवाड ( रा. शिवबानगर,देगलूर) यांचा समावेश आहे.
या कारवाईत ९ मोबाईल ( ७६ हजार ३०० रुपये), रोख २० हजार ३६० रुपये आणि जुगाराचे साहित्य, असा एकूण ९६ हजार ६६० रुपयांचा मुद्देमाल जप्त करण्यात आला. याप्रकरणी देगलूर पोलीस ठाण्यात गुन्हा दाखल करण्यात आला आहे. पोलीस अधीक्षक डॉ. नीलाभ रोहन यांच्या आदेशाने, उपविभागीय पोलीस अधिकारी किरण पोपळघट व परिविक्षाधीन पोलीस उपअधीक्षक वैभव पडवळ यांच्या मार्गदर्शनाखाली पोलीस उपनिरीक्षक हनमंत शिंदे, किरण बेंबडे, तसेच पोलीस अंमलदार केंद्रे, घुमे, मधुकर नामपल्ले आणि विशाल अटकोरे यांनी ही कारवाई केली.
