५ जण गंभीर, मृतांचा आकडा वाढण्याची भीती
भोकर : प्रतिनिधी
भोकरहून नांदेडला जाणा-या भरधाव ट्रकने टाटा मॅजिकला धडक दिल्याने झालेल्या भीषण अपघातात ८ जणांचा मृत्यू झाला तर ५ जण जखमी झाले आहेत. जखमींची प्रकृती गंभीर असल्याने मृतांचा आकडा वाढण्याची भीती व्यक्त केली जात आहे. भोकरपासून जवळच नांदेड-भोकर महामार्गावरील वाकद गावाजवळ सीताखंडीनजीक गुरुवारी सायंकाळी ७ वाजता अपघात झाला. जखमींना तातडीने नांदेड आणि भोकर येथील शासकीय रुग्णालयात दाखल करण्यात आले.
मॅजिक वाहन (क्र. एमएच २६ ए. के. ०५४८ हे नांदेडहून भोकरच्या दिशेने जात होते. त्याचवेळी ट्रक (क्र. ए. पी. २९ पी. ए. ८१२९) भोकरकडून नांदेडकडे येत होता. सीताखंडी परिसरात दोन्ही वाहनांची जोरदार धडक झाली. ही धडक एवढी भीषण होती की, मॅजिक ऑटोचा अक्षरश: चेंदामेंदा झाला. मॅजिक ऑटोत चालकासह एकूण १५ च्या वर प्रवासी असल्याची प्राथमिक माहिती आहे. अपघातानंतर घटनास्थळी एकच गोंधळ उडाला. या अपघातात सय्यद अलमास (रा. बिलालनगर, भोकर), शेख फिरोज (रा. भोकर), पांडुरंग लिंगू वाघमारे (मिस्त्री) आणि त्यांची पत्नी लक्ष्मीबाई पांडुरंग वाघमारे (रा. सय्यदनगर, भोकर), बलवान पवार (रा. पोटातांडा, ता. हदगाव) आणि एक अनोळखी व्यक्ती अशा ६ जणांचा जागीच मृत्यू झाला. यासोबतच आणखी दोघांचा रुग्णालयात उपचारादरम्यान मृत्यू झाला.
भोकरपासून काही अंतरावर असलेल्या सीताखंडी घाटाजवळ हे वाहन आले असता समोरून येणा-या मालवाहू ट्रकशी त्याची समोरासमोर जोरदार धडक झाली. ही धडक इतकी भीषण होती की, यामुळे मॅजिक वाहन रस्त्याच्या बाजूला फेकला गेले. त्यानंतर स्थानिक नागरिकांनी तात्काळ मदतकार्य सुरू करून जखमींना बाहेर काढण्याचा प्रयत्न केला. दुर्घटनेची माहिती मिळताच पोलिस यंत्रणाही घटनास्थळी दाखल झाली. जखमींना तातडीने उपचारासाठी रुग्णालयात हलविण्यात आले. दरम्यान, अपघातात ट्रकचालकही ट्रकमध्ये अडकून पडल्याची माहिती असून त्याला बाहेर काढण्यासाठी बचावकार्य सुरू होते. सायंकाळच्या वेळेत घडलेल्या या भीषण अपघातामुळे नांदेड-भोकर मार्गावरील वाहतुकीवरही परिणाम झाला. घटनास्थळी नागरिकांची मोठी गर्दी झाली होती.
