मुंबई : प्रतिनिधी
भाजप आमदार सत्यजित देशमुख यांनी सांगली जिल्ह्यातील बत्तीस शिराळा शहरात नागपंचमीला जिवंत सापांची पूजा करण्याची प्रथा पुन्हा सुरू करण्याची मागणी केली. इतर अनेक आमदारांनी या मुद्याला पाठिंबा दिला.
दरम्यान, नागपंचमीला जिवंत सापांची पूजा पुन्हा सुरू करण्याच्या मागणीला महाराष्ट्र विधानसभेत मोठा राजकीय पाठिंबा मिळाला आहे. बुधवारी भाजप आमदार सत्यजित देशमुख यांनी या मुद्यावरील लक्षवेधी प्रस्तावाअंतर्गत राज्य सरकारला विशेष विनंती केली की सांगली जिल्ह्यातील बत्तीस शिराळा शहरात ही पारंपरिक प्रथा पुन्हा सुरू करावी.
देशमुख यांच्या मागणीला विधानसभेतील इतर अनेक आमदारांचाही पाठिंबा मिळाला आहे. तसेच या प्रश्नाला उत्तर देताना राज्याचे वनमंत्री गणेश नाईक म्हणाले की, ते केंद्रीय पर्यावरण मंत्री भूपेंद्र यादव यांच्यासमोर हा मुद्दा मांडतील आणि ७-८ जुलै रोजी एक बैठकही आयोजित करण्यात आली आहे. यावेळी नाईक यांनी सांगितले की, नागपंचमीला जिवंत सापांची पूजा स्थानिक लोकांच्या धार्मिक श्रद्धेशी संबंधित आहे आणि सरकार नियमांनुसार त्याचा पुनर्विचार करेल जेणेकरून ही परंपराही जतन होईल आणि सापांना इजा होणार नाही.
बत्तीस शिराळा शहर श्रावण महिन्यात साज-या होणा-या नागपंचमीला जिवंत सापांची पूजा करण्याच्या जुन्या प्रथेसाठी ओळखले जाते. २००२ मध्ये मुंबई उच्च न्यायालयाने बत्तीस शिराळा येथे जिवंत नाग-सापांच्या प्रदर्शनावर आणि पूजेवर बंदी घातली होती. वन्यजीव संरक्षण कायद्यांतर्गत हा आदेश देण्यात आला होता. पर्यावरण कार्यकर्त्यांनी असा युक्तिवाद केला होता की यामुळे सापांना नुकसान होते.
आमदार देशमुख यांनी हा दावा फेटाळून लावला आणि सांगितले की नाग पंचमीला स्थानिक लोक सापांना इजा न करता त्यांची पूजा करतात आणि नंतर त्यांना नैसर्गिक अधिवासात सोडले जाते. जल्लीकट्टू प्रकरणाचा संदर्भ देत देशमुख म्हणाले की, सर्वोच्च न्यायालयाने ज्या प्रकारे तामिळनाडूमध्ये प्रचलित असलेल्या पारंपरिक खेळाला पुन्हा मान्यता दिली, त्याचप्रमाणे नागपूजेसाठीही केली पाहिजे. भाजप आमदार गोपीचंद पडळकर आणि राष्ट्रवादी काँग्रेस (सपा) आमदार जयंत पाटील यांनीही या मागणीला पाठिंबा दिला आणि म्हणाले की सरकारी अहवालांनी हे स्पष्ट केले आहे की नागपंचमीच्या वेळी सर्पदंशामुळे होणा-या मृत्यूंचे आरोप निराधार आहेत.
