संभाजीनगरमध्ये एफडीएची ऑईल कंपन्यांवर धाड
छ. संभाजीनगर : प्रतिनिधी
राज्यात अन्न व औषध प्रशासन विभागाने गेल्या महिनाभरापासून कारवाईंचा धडाका लावला असून गावखेड्यातल्या पानपट्टीपासून ते बड्या कंपन्यांपर्यंत अधिकारी पोहोचले आहेत. सनदी अधिकारी तुकाराम मुंढे यांनी या विभागाच्या आयुक्तपदाचा पदभार स्वीकारल्यापासून कारवाईला वेग आला असून दूध भेसळ, हॉटेल्स, मेडिकलसह इतरही ठिकाणी विभागाने धाडी टाकत कारवाई केली. दरम्यान, आज खाद्यतेल कंपनीवर छापा टाकून तब्बल ३ कोटींचा माल जप्त केला.
छत्रपती संभाजीनगर येथे खाद्यतेलाच्या नावाखाली ग्राहकांच्या आरोग्याशी खेळ सुरू असल्याचा धक्कादायक प्रकार समोर आला. अन्न व औषध प्रशासनाने २ ऑईल रिपॅकिंग युनिट्सवर धाड टाकून तब्बल २ कोटी ९३ लाख रुपयांहून अधिक किमतीचा संशयित निकृष्ट दर्जाचा खाद्यतेलाचा साठा जप्त केला. कारवाईदरम्यान अस्वच्छ वातावरण, वापरलेले डबे पुन्हा वापरणे, फूड ग्रेड प्रमाणपत्रांचा अभाव आणि प्रयोगशाळेशिवाय तेलाचे पॅकिंग अशा गंभीर त्रुटी उघड झाल्या. या दोन्ही आस्थापनांचे परवानेही तात्काळ निलंबित करण्यात आले.
२ ऑईल कंपन्यांवर छापा
सेफ फूड, सेफ महाराष्ट्र मोहिमेअंतर्गत अन्न व औषध प्रशासनाच्या पथकाने ११ जुलै रोजी पैठण येथील बागरिया अॅग्रो प्रॉडक्ट्स आणि छत्रपती संभाजीनगर शहरातील बागरिया व्हेजिटेबल प्रॉडक्ट्स या २ ऑईल रिपॅकिंग युनिट्सवर अचानक छापा टाकला. त्यावेळी अस्वच्छ परिस्थितीत खाद्यतेलाचे रिपॅकिंग सुरू असल्याचे आढळून आले.
पामतेलासह विविध खाद्यतेल जप्त
कारवाईत पाम, सोयाबीन, कपाशी आणि अज्ञात वनस्पती तेलासह एकूण २ कोटी ९३ लाख ३५ हजार ६०३ रुपयांचा संशयित निकृष्ट दर्जाचा खाद्यतेलाचा साठा जप्त करण्यात आला. पुढील तपासासाठी तेलाचे नमुने प्रयोगशाळेत पाठवण्यात आले.
