पंढरपूर : तालुका प्रतिनिधी
राज्याचे पोलिस महासंचालक सदानंद दाते महाराष्ट्र राज्य मुंबई यांनी श्रीक्षेत्र पंढरपूर येथे आगामी कालावधीमध्ये होत असलेल्या आषाढी वारी २०२६ च्या अनुषंगाने भेट दिली. यावेळी त्यांनी पंढरपूरात आषाढी वारीच्या संदर्भाने जिल्ह्यामध्ये वाटचाल करत असलेल्या संताच्या पालख्या, दिंडी व पंढरपूर येथील वारी बंदोबस्ताच्या अनुषंगाने आढावा घेतला.
पोलिस महासंचालक यांनी पुणे येथून वाहनाने निघून पुणे ग्रामीण, सातारा व सोलापूर ग्रामीण हद्दीतील पालखी मार्गाची पाहणी करून संबंधीत विभागाचे अधिकारी यांना सुरक्षेसाठी आवश्यक सुधारणा करण्याच्या सुचना दिल्या. त्यानंतर मुक्ताई पोलिस संकुल पंढरपूर येथे आयोजीत केलेल्या आढावा बैठकीमध्ये जिल्हा प्रशानाकडून आषाढी वारीच्या संदर्भाने वारी करीता येणारे भाविकांची संख्या, त्यांना शासनाकडून पुरविण्यात येणार्या सुविधा, सुरक्षा याबाबतची माहिती घेतली. तसेच जिल्हा प्रशासनाकडून पंढरपूर येथे सुरू केलेल्या एकात्मिक नियंत्रण कक्ष बाबत माहिती घेतली. तसेच आषाढी वारी संदर्भाने पोलिस विभागाकडून लावण्यात येत असलेल्या बंदोबस्ताबाबतची माहिती घेऊन आवश्यक ठिकाणी सुधारणा करण्याबाबत आदेश दिले आहेत.
दरम्यान त्यांनी श्री. विठ्ठल रूक्मीणी मंदीर परीसर, महाद्वार चौक, वाळवंट या भागात पायी चालत फिरून या भागात दर्शनासाठी येणारे भावीक, तेथील गर्दीचे नियंत्रण याबाबत बारकाईने माहिती घेतली आहे. तसेच बंदोबस्तामध्ये आवश्यक सुचना देऊन त्यांची अंमलबजावणी करण्याबाबत आदेशीत केले आहे.
मुक्ताई पोलिस संकुल, पंढरपूर येथे आयोजीत केलेल्या आढावा बैठकीस शिरीष जैन, आयुक्त राज्य गुप्तवार्ता विभाग महाराष्ट्र राज्य, मुंबई यांच्यासह रंजनकुमार शर्मा विशेष पोलिस महानिरीक्षक कोल्हापूर, कार्तिकेयन एस जिल्हाधिकारी, सोलापूर, अतुल कुलकर्णी पोलिस अधीक्षक सोलापूर ग्रामीण व विजय कबाडे अपर पोलिस अधीक्षक सोलापूर ग्रामीण यांच्यासह सार्वजनिक बांधकाम विभाग, मंदीर समिती, रेल्वे विभाग व नगरपरिषद पंढरपूर येथील वरीष्ठ अधिकारी उपस्थित होते.
