सोलापूर : प्रतिनिधी
काळी जादू, लैंगिक शोषणासह फसवणुकीचे गंभीर गुन्हे असलेल्या भोंदू मनोहर मामा भोसले याला चौकशीसाठी कुर्डुवाडी पोलिस ठाण्याच्या पथकाने शुक्रवारी (२४ एप्रिल) दुपारी पुण्यात मांजरी पोलिस ठाण्याच्या हद्दीतून पुन्हा अटक केली आहे. मनोहर भोसले याने बांधकाम व्यापारी गौतम कसबे (रा. सोलापूर) यांना धंद्यात प्रगती करण्यासाठी दोन लाख रुपयांची मागणी केली. त्यातील ५० हजार रुपये स्वीकारून आपली फसवणूक केल्याची तक्रार पोलिसांकडे प्राप्त झाली.
त्यानुसार कुर्डुवाडी पोलिस ठाण्याचे पोलिस निरीक्षक अतुल मोहिते त्यांच्या पथकासह पुण्याला रवाना झाले होते. शुक्रवारी (दि. २४) पुण्यातील मांजरी पोलिस ठाण्याच्या हद्दीतून दुपारी २ च्या सुमारास मनोहर भोसलेसह (रा. उंदरगाव, ता. करमाळा) त्याचा साथीदार विशाल वाघमारे (रा. मांजरी) या दोघांना ताब्यात घेऊन सायंकाळी कुर्डुवाडी पोलिस ठाण्यात आणण्यात आले.
गौतम कसबे हे रिअल इस्टेट धारक आहेत. आपल्या व्यवसायामध्ये वारंवार येणा-या अपयशामुळे गौतम कसबे हे भोंदू मनोहर भोसले याच्या संपर्कात आले. या दरम्यान मनोहर याने पूजा-अर्चा केल्यास संकटे दूर होतील आणि व्यवसायात प्रगती होईल असे सांगून कसबेंकडे २ लाख रुपयांची मागणी केली. त्यापैकी ५० हजार रुपये त्याला दिले. मात्र, यानंतरही कसबेंच्या व्यवसायात फारशी सुधारणा झाली नाही. अखेर कसबेंनी पोलिस ठाणे गाठून मनोहर भोसले याच्याविरोधात फिर्याद दिली.
संत बाळूमामाचा अवतार असल्याचे सांगणा-या करमाळा तालुक्यातील उंदरगाव येथील भोंदूबाबा मनोहरमामा भोसले याच्याविरुद्ध ९ सप्टेंबर २०२१ मध्ये करमाळा पोलिस ठाण्यात लैंगिक शोषणाचा गुन्हा दाखल झाला होता. १९ सप्टेंबर २०२१ रोजी करमाळा न्यायालयाने ७ दिवसांची (२७ सप्टेंबरपर्यंत) पोलिस कोठडी मंजूर केली. घोटीच्या आश्रमातून दर अमावास्या-पौर्णिमेला भविष्य बघायचा, अशी माहिती समोर आली आहे. पुण्यातून अटकेनंतर तो पुन्हा चर्चेत आला आहे.
‘मी संत बाळूमामाचा अवतार’ असल्याचे सांगून कर्करोग बरा करतो असे खोटे सांगत मनोहर भोसले बाभळीचा पाला, साखर, भंडारा विकत घ्यायला लावायचा. २०२१ साली शशिकांत खरात यांची २ लाख ५१ हजार रुपयांची फसवणूक केल्याप्रकरणी मनोहर भोसलेला अटक करम्यात आली होती. त्यानंतर मनोहर भोसलेने आश्रमात साथीदारांसह लैंगिक शोषण केल्याचा आरोप महिलेने केला होता. त्याही प्रकरणात भोसलेला २०२१ मध्ये ताब्यात घेतले होते.
